فراز آئینہ

[حسان خان]

تجھ سے بچھڑا ہوں تو آج آیا مجھے اپنا خیال​

ایک قطرہ بھی نہیں باقی کہ ہوں پلکیں تو نم​

میری آنکھوں کے سمندر کون صحرا پی گئے​

ایک آنسو کو ترستی ہے مری تقریبِ غم​

​

میں نہ رو پایا تو سوچا مسکرا کر دیکھ لوں​

شاید اس بے جان پیکر میں کوئی زندہ ہو خواب​

پر لبوں کے تن برہنہ شاخچوں پر اب کہاں​

مسکراہٹ کے شگوفے خندۂ دل کے گلاب​

​

کتنا ویراں ہو چکا ہے میری ہستی کا جمال​

تجھ سے بچھڑا ہوں تو آج آیا مجھے اپنا خیال​

​

(احمد فراز)​