آئن سٹائن تے اوہدی بیوی

شمشاد خان

محفلین
آئن سٹائن تے اوہدی بیوی

گل نوخیز اختر نوخیز


دنیا دا ذہین ترین انسان آئن سٹائن بچپن وچ دماغی طور تے اک کمزور انسان سی‘ اوہدا سِر موٹا تے زبان بولن دی صلاحیت توں محروم سی‘ بڑی مشکل نال کُجھ الفاظ اڑ اڑ کے بولداا سی جو کئی واری اوہدی ماں نوں وی سمجھ نہیں آندے سن‘ کہیا جاندا اے کہ آئن سٹائن نوں ’’آٹزم‘‘ دی بیماری اے جیہدی وجہ توں اوہ اپنے آپ وچ گواچا رہندا سی تے اپنے معاملاں وچ کسے دی دخل اندازی پسند نہیں کردا سی‘ نوں سال دی عمر تیک اوہ بولن دی صلاحیت توں محروم رہیا‘ فیر اچانک اک دن کھاون دی میز تے جدوں اوہدے ساہمنے سوپ رکھیا گیا تاں اوہنے سوپ دا پہلا چمچہ مونہہ وچ پاندے ای کہیا ’’سوپ بہت گرم اے‘‘ ایہہ سُندے ای اوہدے ماں پیو خوشی نال اُچھل پئے‘ خوشی نال بے حال ماں نے آئن سٹائن توں پُچھیا کہ اجیہے الفاظ توں پہلوں کیوں نہیں بولے؟؟؟ آئن سٹائن نے جواب دتا کہ ’’اوہدے توں پہلوں ہر چیز نارمل سی ایس لئی میں نہیں بولدا ساں‘‘ اوہنے دوجا ویاہ مالیوانا ناں دی سوانی نال کیتا‘ ایس ویاہ دی دلچسپ گل اوہ معاہدا اے جو اوہنے اپنی بیوی نال کیتا‘ معاہدے وچ طے ہویا سی کہ اوہدی بیوی اوہدے کپڑے تے سامان سدا صاف تے بہترین حالت وچ رکھے گی‘ تن ویلے دا کھانا آئن سٹائن نوں اوہدے کمرے وچ دتا جاوے گا‘ آئن سٹائن دا کمرہ‘ سٹڈی روم تے خاص طور تے اوہدی میز بالکل صاف رکھی جاوے گی تے کوئی فالتو چیز ایتھے نظر نہیں آوے گی‘ جدوں تیک آئن سٹائن دا موڈ نہ ہووے‘ بیگم اوہدے نال کوئی گل نہیں کرے گی‘ آئن سٹائن دوجے لوکاں دے ساہمنے اپنی بیوی توں لاتعلق رہوے گا تے آخری شرط ایہہ سی کہ ساڈے وچکار کُجھ ضروری تعلقات توں وکھ کوئی ہور تعلق نہیں ہووے گا۔۔۔!!! ماشاء اللہ! شاید ایہی اوہ مجاہدانا کم نیں جیہناں دی بدولت آئن سٹائن نے اینی ذہانت حاصل کیتی۔ میں سوچ رہیا آں کہ جے آئن بھائی اپنی بیوی نال اینا سخت رویا نہ رکھدے تے نرمی نال پیش آندے تاں صورت حال کیہ ہونی سی۔
بیوی:آئن۔۔۔ وے آئن۔۔۔!!!
آئن سٹائن: جی جان۔۔۔ کیہ ہویا؟؟؟
بیوی:وے کوکنگ آئل ختم ہو گیا اے!!!
آئن سٹائن: اوہو۔۔۔ جان حالے دو دن پہلاں وی لیاندا سی۔
بیوی:وے یاد کر۔۔۔ تینوں پنج کلو دا ڈبا لیاون گھلیا سی تے توں کلو والا پیکٹ لے آیا سیں۔
آئن سٹائن: اچھا تھوڑی دیر تیک لیا دیندا آں‘ ذرا اک سائنسی تھیوری لکھ لواں۔
بیوی: وے اگ لگے تیری سائنس نوں۔۔۔ آئل لے کے آ تے اک پیکٹ ماچساں دا تے پنج رُپئے دا ’’استنبول دا چھلکا‘‘ وی لیندے آنا۔
آئن سٹائن: پلیز جان۔۔۔ بس صرف ادھے گھنٹے دی مہلت دے دیو‘ میری ریسرچ مکمل ہون والی اے۔
بیوی: دفع دور۔۔۔ جدوں ویکھو ساینس‘ جدوں ویکھو ساینس۔۔۔ نہ توں اینی ساینس پڑھ کے کیہڑا عالم لوہار بن جانا اے؟؟
آئن سٹائن: پلیز جان انج نہ آکھ۔۔۔ ساینس میری زندگی اے‘ میں ہر ویلے ساینس دے گھیرے وچ رہندا آں۔
بیوی:بیوی۔۔۔ ہا۔۔۔ہائے۔۔۔ ویاہ توں پہلاں توں آکھیا سی کہ میں گڑھی شاہو وچ رہندا آں؟؟
آئن سٹائن: اوہو جان‘ میرا مطلب اے کہ میں ہر ویلے سائنس وچ گواچا رہندا آں‘ سائنس میرا عشق اے‘ میرا پیار اے۔
بیوی:لکھ لعنت اے بئی تیرے عشق اُتے۔۔۔ جے اینا وڈا سائنسدان ایں تاں میری اک گل دا جواب دے۔۔۔!!!
آئن سٹائن: پُچھ جان۔۔۔!!!
بیوی: عورت جے واہیاتی اُتے اُتر آوے تاں ورلڈ ریکارڈ بناون لئی کیہ کُجھ کر سکدی اے؟
آئن سٹائن: پلیز جان۔۔۔ اجیہے سوال نہ کرے‘ میں آئن سٹائن آں‘ وینا ملک نہیں۔۔۔!!!
بیوی: وے ایہہ تاں بڑا اسان جیہیا سوال سی۔۔۔ چل ایہہ دس میری وڈی خالہ دا السر کدوں ٹھیک ہووے گا؟؟؟
آئن سٹائن: اوہ ۔۔۔مم۔۔۔ مینوں کیہ پتا؟؟؟
بیوی: مینوں پہلوں ای پتا سی کہ تیرے جیہے نکمے بندے نوں سواہ تے مٹی پتا ہونا اے۔۔۔ روندا ساینس نوں۔۔۔!!!
آئن سٹائن: پپ۔۔۔ پلیز جان۔۔۔ جے اجازت ہووے تاں تھوڑا کم کر لواں؟؟؟
بیوی: وے کم توں کیہ کرنا اے‘ ویلھیاں کھائی جاندا ایں‘ ہزار واری آکھیا اے کہ میرے تائے دے پُتر دے نال سبزی منڈی چلا جایا کر‘ اوہ وی بہت وڈا سائنسدان اے۔۔۔!!!
آئن سٹائن: اوہ کیہ کردا اے جان؟؟؟
بیوی: سبزی منڈی وچ وڈے تے نکے گنڈھے وکھ کردا اے۔۔۔!!!
آئن سٹائن: لاحول ولاقوۃ۔۔۔ جان کتھے اوہ‘ کتھے میں۔۔۔!!!
بیوی: ظاہری گل اے کہ کتھے اوہ روز دا دو سو رُپیا کماون والا تے کتھے سُسرالیاں دے ٹُکڑیاں تے پلن والا۔۔۔!!
آئن سٹائن: پلیز جان۔۔۔ انج نہ آکھ۔۔۔ میرے سُسرالی تاں آپ لنگر تے گزارا کردے نیں۔
بیوی: کیہ آکھیا۔۔۔؟ وے تیرا بیڑا غرق۔۔۔ تیری ریسرچ وچ کیڑے پین۔۔۔ اوہ نہ مدد کرن تاں توں بھُکھا مر جاویں۔۔۔!!!
آئن سٹائن: اچھا پلیز جان۔۔۔ ایہہ لڑائی بعد وچ کر لینا۔۔۔ میرا ذہن کسے ہور پاسے اے۔۔۔!!!
بیوی: مینوں پہلوں ای شک سی‘ ساہمنے والی ہمسائی دی باری وی تھوڑی جیہی کھُلی ہوئی اے‘ سچ سچ دس آئن سٹائن۔۔۔ تیرا ذہن کیہڑے پاسے اے؟ جھوٹھ بولیا تاں میں تیری سائنس بند کر دیواں گی۔
آئن سٹائن: فارگاڈ سیک جان۔۔۔ میرے کول اجیہے کماں لئی ویلا نہیں‘ میرا دماغ تاں ہر ویلے اپنے سائنسی کم وچ مگن رہندا اے۔
بیوی: سارا کُجھ جاندی آں میں تیرے جیہے نکمے سائنسی دماغ نوں۔۔۔ ٹی وی دا ریموٹ تاں تیرے توں ٹھیک نہیں ہوندا‘ وڈا آیا سائنسدان۔۔۔!!!
آئن سٹائن: (آہ بھر کے) ٹھیک اے میری جان۔۔۔ اج توں سائنس‘ ختم کل توں میں وی سبزی منڈی جایا کراں گے۔۔۔!!!
بیوی: (خوشی نال) واقعی۔۔۔؟ ہائے آئن سٹائن۔۔۔ توں کنا جینئس ایں۔۔۔!!!
 
Top