کلیات اصغر

[طارق شاہ]

(٧٧)

حُسن پر حُسن تبسّم، صبحِ خندانِ بہار

ہے سراپا حُسن وہ رنگیں ادا، جانِ بہار
حُسن پر حُسنِ تبسّم، صبحِ خندانِ بہار

ایک سی گلکاریاں ہیں، ایک سی رنگیں بہار
لے کے دامانِ نظر سے تا بہ دامانِ بہار

ذرّہ ذرّہ پھر بنے گا اِک جہانِ رنگ و بُو
چُپکے چُپکے ہورہا ہے عہد وپیمانِ بہار

سبزہ و گُل لہلہاتے ہیں، نمو کا زور ہے
موجِ رنگا رنگ ہے یا جوشِ طُوفانِ بہار

یُوں نہ اِس دورِ خِزاں کو بے حقِیقت جانئیے
پرورِش پائی ہے اِس نے زیرِ دامانِ بہار

۔۔۔ ۔۔۔ ۔۔۔ ۔۔۔ ۔۔۔ 000000۔۔۔ ۔۔۔ ۔۔۔ ۔۔۔ ۔۔۔

پُھول ایک بھی نہیں دامنِ پاکباز میں

نالۂ دِلخراش میں آہِ جگر گدُازمیں
کون سِتم طرازہے پردۂ سوزوسازمیں

چاہیئے داغِ معصِیت اُس کے حرِیم نازمیں
پُھول یہ ایک بھی نہیں دامنِ پاکبازمیں

یا تو خود اپنے ہوش کو مستی و بیخودی سِکھا
یا نہ کِسی کوساتھ لے اُس کے حرِیم ناز میں

حشرمیں اہلِ حشرسے دیکھئے خوش ادائیاں
فردِ عمل تو چاہیئے دستِ کرشمہ ساز میں

اب وہ عدم عدم نہیں، پَرتوِ حُسنِ یار سے !
باغ و بہار بن گیا آئینہ دستِ ناز میں

گمُ ہے حقِیقت آشنا بندۂ دہر بے خبر
ہوش کسی کو بھی نہیں مے کدۂ مجاز میں

موجِ نسیمِ صُبْح میں بُوئے صَنم کدہ بھی ہے
اور بھی جان پڑگئی کیفِیَتِ نمازمیں

کچُھ تو کمالِ عِشق نے حُسن کا رنگ اُڑا دیا
ایک ادائے ناز ہے بیخودئ نِیازمیں

شورِشِ عندلیب نے رُوح چمن میں پُھونک دی
ورنہ یہاں کلی کلی مست تھی خواب نازمیں

اصغرِ خاکسار وہ ذرّۂ خود شناس ہے
حشرسا کردیا بپا جس نے جہانِ راز میں

۔۔۔ ۔۔۔ ۔۔۔ ۔۔۔ ۔۔۔ 000000۔۔۔ ۔۔۔ ۔۔۔ ۔۔۔ ۔۔۔

 

[طارق شاہ]

(٧٨)


تم نے جہاں بدل دیا آکے مِری نگاہ میں

اب نہ کہیں نِگاہ ہے، اب نہ کوئی نِگاہ ہے
محو کھڑا ہُوا ہُوں میں حُسن کی جلوہ گاہ میں

اب تو بہارِرنگ، ورائےدرائےآب ورنگ
عِشق کِسی نِگاہ میں، حُسن کِسی نگاہ میں

حُسنِ ہزارطرز کا ایک جہاں اسِیر ہے
مُلحدِ باخبر بھی گمُ جلوۂ لا الهٰ میں

در یہ جو تیرے آ گیا، اب نہ کہیں مُجھے اُٹھا
گردشِ مہر و ماہ بھی دیکھ چُکا ہُوں راہ میں

اب وہ زماں نہ وہ مکاں، اب وہ زمِیں نہ آسماں
تُم نے جہاں بدل دِیا آ کے مِری نِگاہ میں

رازِ فتادگی نہ پُوچھ ، لذّتِ خستگی نہ پُوچھ
ورنہ ہزار جبریئل چُھپ گئے گردِ راہ میں

لفظ نہیں، بیاں نہیں، یہ کوئی داستاں نہیں
شرحِ نیاز و عاشقی ختم ہے ایک آہ میں

۔۔۔۔۔۔۔۔۔۔۔۔۔۔۔۔000000۔۔۔۔۔۔۔۔۔۔۔۔۔۔۔۔۔

 

[طارق شاہ]

(٧٩)


میری آنکھیں بند ہیں اور چشم انجام باز ہے

پردۂ فِطرت میں میرے اِک نوائے راز ہے
ذرّہ ذرّہ اِس جہاں کا گوش برآواز ہے

وہ سراپا حُسن ہے یا نغمۂ بے ساز ہے
چشمِ حیرت ہے کہ اِک فریادِ بےآواز ہے

تو بہت سمجھا تو کہہ گزُرا فریبِ رنگ و بُو
یہ چمن لیکن اُسی کی جلوہ گاہِ ناز ہے

گوشہ گوشہ علم و حِکمت کا ہے سب دیکھا ہُوا
یہ غنیمت ہے درِ میخانہ اب تک باز ہے

کیف و مستی کی حقِیقت ایک مینائے تِہی
نغمہ بھی اُس بزم میں ٹُوٹا ہُوا اِک ساز ہے

کیا گزُرتی ہے شبِ غم، تم اُسی سے پُوچھ لو
ایک پیاری شکل، میری محرم و ہم راز ہے

بندِشوں سے اور بھی ذوقِ رہائی بڑھ گیا
اب قفس بھی ہم اسِیروں کو پرِ پرواز ہے

ہے خِرد کی، عِشق کی دونوں کی ہستی پر نظر !
یہ شہید نغمہ ہے، وہ مبتلائے ساز ہے

ہوش باقی ہوں تو اُس پر کاوشِ بیجا بھی ہو
کیا خبر مُجھ کو، کہ یہ آواز ہے یا ساز ہے

کیا تماشا ہے کہ سب ہیں اور پھر کوئی نہیں
اُس کی بزمِ ناز بھی خَلوَت سرائے راز ہے

سُننے والا گوشِ بُلبُل کے سِوا کوئی نہیں
ریشہ ریشہ اِن گُلوں کا اِک صدائے راز ہے

عام ہے وہ جلوہ، لیکن اپنا اپنا طرزِ دید
میری آنکھیں بند ہیں اور چشمِ انجم باز ہے

ختم کر اصغر، یہ آشفتہ نوائی ختم کر!
کون سُنتا ہے اِسے، یہ درد کی آواز ہے

۔۔۔ ۔۔۔ ۔۔۔ ۔۔۔ ۔۔۔00000۔۔۔ ۔۔۔ ۔۔۔ ۔۔۔ ۔۔۔

 

[طارق شاہ]

(٨٠)


مُجھ سے دیکھا نہ گیا حُسن کا رُسوا ہونا

مئے بے رنگ کا سو رنگ سے رُسوا ہونا
کبھی میکش، کبھی ساقی، کبھی مِینا ہونا

از ازل تا بہ ابد محوِ تماشا ہونا
میں وہ ہُوں، جس کو نہ مرنا ہے نہ پیدا ہونا

سارے عالم میں ہے بیتابی و شورش بَرپا
ہائے اُس شوخ کا ہم شکلِ تمنّا ہونا

فصلِ گُل کیا ہے؟ یہ معراج ہے آب و گِل کی
میری رگ رگ کو مُبارک رگِ سودا ہونا

کہہ کے کچھ لالہ وگُل، رکھ لِیا پردہ میں ہے
مُجھ سے دیکھا نہ گیا حُسن کا رُسوا ہونا

جلوۂ حُسن کو ہے چشمِ تحیّر کی طلب
کِس کی قسمت میں ہے محرُومِ تماشا ہونا

دہرہی سے، وہ نمایاں بھی ہے پنہاں بھی ہے
جیسے صہبا کے لئے پردۂ مِینا ہونا

تیری شوخی، تِری نیرنگ ادائی کے نِثار
اِک نئی جان ہے تجدِید تمنّا ہونا

حُسن کے ساتھ ہے بیگانہ نِگاہی کا مزہ
قہْر ہے قہْر مگر عرضِ تمنّا ہونا

اِس سے بڑھ کر کوئی بے راہ رَوی کیا ہوگی
گامِ پُرشوق کا منزِل سے شناسا ہونا

مائلِ شعر و غزل پھر ہے طبیعت اصغر
ابھی کچُھ اور مُقدّر میں ہے رُسوا ہونا

۔۔۔ ۔۔۔ ۔۔۔ ۔۔۔ ۔۔۔ 000000۔۔۔ ۔۔۔ ۔۔۔ ۔۔۔ ۔۔۔

 

[طارق شاہ]

(٨١)



رنگ کو شعلہ بنا کر کون پروانے میں ہے


ایک ایسی بھی تجلّی آج میخانے میں ہے
لُطف پینے میں نہیں ہے بلکہ کھوجانے میں ہے

معنئ آدم کجا و صُورتِ آدم کجُا ؟
یہ نِہاں خانے میں تھا، اب تک نِہاں خانے میں ہے

خرمنِ بُلبُل تو پُھونکا عِشقِ آتش رنگ نے
رنگ کو شُعلہ بنا کر کون پروانے میں ہے؟

جلوۂ حُسنِ پَرِستِش گرمئی حُسنِ نیاز
ورنہ کچُھ کعبے میں رکھّا ہے، نہ بُت خانے میں ہے

رِند خالی ہاتھ بیٹھے ہیں اُڑا کر جُزوکُل
اب نہ کچھ شیشے میں ہے باقی، نہ پیمانے میں ہے

میں یہ کہتا ہُوں فنا کو بھی عطا کر زندگی!
تُو کمالِ زندگی کہتا ہے مرجانے میں ہے

جس پہ بُت خانہ تصدّق، جس پہ کعبہ بھی نِثار
ایک صُورت ایسی بھی، سُنتے ہیں بُت خانے میں ہے

کیا بہارِ نقشِ پا ہے، اے نیازِ عاشِقی
لُطف سَررکھنے میں کیا، سَررکھ کے مرجانے میں ہے

بے خُودی میں دیکھتا ہُوں بے نِیازی کی ادا
کیا فنائےعاشِقی خود حُسن بن جانے میں ہے

۔۔۔ ۔۔۔ ۔۔۔ ۔۔۔ ۔۔۔ ۔000000۔۔۔ ۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٨٢)


ہمہ تن دِید بنیں تُجھ کو سَراپا دیکھیں !

دیکھنے والے فروغِ رُخِ زیبا دیکھیں
پردۂ حُسن پہ خود حُسن کا پردا دیکھیں

اشکِ پیہم کو سمجھ لیتے ہیں اربابِ نظر
حُسن تیرا مِرے چہرے سے جَھلکتا دیکھیں

ہے تقاضا تِرے جَلوے کی فراوانی کا
ہمہ تن دِید بنیں تُجھ کو سَراپا دیکھیں

ساقِیا جام بَکف پھر ہو ذرا گرم نوا
حُسنِ یوسف، دمِ عیسیٰ، یدِ بیضا دیکھیں

حُسنِ ساقی کا تومَستوں کو ذرا ہوش نہیں
کچھ جَھلک اُس کی سرِ پردۂ مِینا دیکھیں

۔۔۔۔۔۔۔۔۔۔۔۔۔۔۔۔۔۔۔۔00000۔۔۔۔۔۔۔۔۔۔۔۔۔۔۔۔۔۔۔۔


رُخِ لیلیٰ کو کیا دیکھیں گے محمل دیکھنے والے


یہ ننگِ عاشِقی ہے سُود و حاصِل دیکھنے والے
یہاں گُمراہ کہلاتے ہیں منزِل دیکھنے والے

خطِ ساغر میں رازِ حق و باطِل دیکھنے والے
ابھی کچُھ لوگ ہیں ساقی کی محفِل دیکھنے والے

مزے آ آ گئے ہیں عِشوہ ہائے حُسنِ رنگِیں کے
تڑپتے ہیں ابھی تک رقصِ بِسمِل دیکھنے والے

یہاں تو عُمْر گزُری ہے اِسی موج و تلاطم میں
وہ کوئی اور ہوں گے سیر حاصِل دیکھنے والے

مِرے نغموں سے صہبائے کہُن بھی ہوگئی پانی
تعجّب کر رہے ہیں رنگِ محفِل دیکھنے والے

جنُونِ عِشق میں ہستئ عالم پر نظر کیسی؟
رُخِ لیلیٰ کو کیا دیکھیں گے محمل دیکھنے والے


۔۔۔۔۔۔۔۔۔۔۔۔۔۔۔۔۔۔۔۔0000000۔۔۔۔۔۔۔۔۔۔۔۔۔۔۔۔۔۔۔۔

 

[طارق شاہ]

(٨٣)


مقام اپنا سمجھتےہیں نہ ہم منزل سمجھتے ہیں


متاعِ زیست کیا، ہم زیست کا حاصِل سمجھتے ہیں
جِسے سب درد کہتے ہیں اُسے ہم دل سمجھتے ہیں

اِسی سے دِل، اِسی سے زندگئ دِل سمجھتے ہیں
مگر حاصِل سے بڑھ کر سعئ بےحاصِل سمجھتے ہیں

کبھی سُنتے تھے ہم یہ زندگی ہے وہم و بے معنیٰ
مگر اب موت کو بھی خطرۂ باطِل سمجھتے ہیں

بہت سمجھے ہُوئے ہے شیخ راہ و رسمِ منزِل کو
یہاں منزِل کو بھی ہم جادۂ منزِل سمجھتے ہیں

اُبھرنا ہو جہاں، جی چاہتا ہے ڈُوب مرنے کو
جہاں اُٹھتی ہو موجیں، ہم وہاں ساحِل سمجھتے ہیں

کوئی سَرگشتۂ راہِ طرِیقت اِس کو کیا جانے !
یہاں اُفتادگی کو حاصلِ منزِل سمجھتے ہیں

تماشا ہے نیاز و ناز کی باہم کشاکش کا !
میں اُن کا دِل سمجھتا ہُوں، وہ میرا دِل سمجھتے ہیں

عبث ہے دعوئ عِشق و محبّت خام کاروں کو
یہ غم دیتے ہیں، جس کو جوہرِ قابِل سمجھتے ہیں

غمِ لااِنتہا، سعئ مُسلسل، شوقِ بے پایاں
مقام اپنا سمجھتےہیں نہ ہم منزِل سمجھتے ہیں

۔۔۔ ۔۔۔ ۔۔۔ ۔۔۔ ۔۔۔ ۔۔۔ ۔۔0000000۔۔۔ ۔۔۔ ۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٨٤)


کعبہ و بُت خانہ ہیں دونوں خُدا کے سامنے

راز کہیئے یہ کسی اہلِ وفا کے سامنے
آشنا گمُ ہوگیا اِک آشنا کے سامنے

وہ ازل سے تا ابد ہنگامۂ محشر بپا
میں اِدھر خاموش اک آفت ادا کےسامنے

دیکھئےاُٹھتا ہے کب کوئی یہاں سے اہلِ درد
کعبہ و بُت خانہ ہیں دونوں خُدا کے سامنے

کامیابِ شوق کی ناکامیوں کو دیکھئے
حرفِ مطلب محو ہے جوشِ دُعا کے سامنے

اب مجھے خود بھی نہیں ہوتا ہے کوئی امتیاز
مِٹ گیا ہُوں اِس طرح اُس نقشِ پا کے سامنے

کائنات دہر کیا رُوح الامیں بے ہوش تھے
زدگی جب مُسکرائی ہے قضا کے سامنے

حشر ہے زاہد، یہاں ہر چیز کا ہے فیصلہ
لا کوئی حُسنِ عمل میری خطا کے سامنے

رشکِ صد اِیماں ہے اصغر میرا طرزِ کافری
میں خُدا کے سامنے ہُوں، بُت خُدا کے سامنے

۔۔۔۔۔۔۔۔۔۔۔۔۔۔۔00000۔۔۔۔۔۔۔۔۔۔۔۔۔۔

 

[طارق شاہ]

(٨٥)


ابھی تک شاخِ گُل کی شُعلہ افشانی نہیں جاتی

ستم کے بعد اب اُن کی پشیمانی نہیں جاتی
نہیں جاتی، نظر کی فتنۂ سامانی نہیں جاتی

نمودِ جلوۂ بے رنگ سے ہوش اِس قدر گمُ ہیں
کہ پہچانی ہُوئی صورت بھی پہچانی نہیں جاتی

پتہ مِلتا نہیں اب آتشِ وادئ ایمن کا
مگر مینائے مے کی نُور افشانی نہیں جاتی

مگر اِک مُشتِ پر کی خاک سے کچُھ ربط باقی ہے
ابھی تک شاخِ گل کی شُعلہ افشانی نہیں جاتی
چمن میں چھیڑتی ہے کِس مزے سے غنچہ و گُل کو
مگر موجِ صبا کی پاک دامانی نہیں جاتی

اُڑا دیتا ہُوں اب بھی تارِ تارِ ہست و بُود اصغر
لباسِ زہد وتمکیں پر بھی عُریانی نہیں جاتی
۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٨٦)


کچُھ فِتنے اُٹھے حُسن سے کچُھ حُسنِ نظر سے

جلوہ تِرا اب تک ہے نہاں چشمِ بشر سے
ہرایک نے دیکھا ہے تُجھے اپنی نظر سے

یہ عارضِ پُر نُور پہ زُلفیں ہیں پریشاں
کمبخت نِکل گمرہئ شام و سحر سے

مے دافعِ آلام ہے، تریاق ہے لیکن
کچھ اور ہی ہو جاتی ہے ساقی کی نظر سے

وہ شوخ بھی معذور ہے، مجبُور ہُوں میں بھی
کچُھ فِتنے اُٹھے حُسن سے، کچُھ حُسنِ نظر سے

اِس عالمِ ہستی میں نہ مرنا ہے نہ جینا
تُو نے کبھی دیکھا نہیں مستوں کی نظر سے

جانبازوں کے سِینے میں ابھی اور بھی دل ہیں
پھر دیکھئے اِک بار محبّت کی نظر سے

نظّارۂ پُر شوق کا اِک نام ہے جینا
مرنا اِسے کہئے کہ گزُرتے ہیں اِدھر سے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٨٧)


رگِ ہرتاک سے آتی ہے کھنچکرمیری قسمت کی

ذرا سی آس مِلنا چاہیئے دردِ محبّت کی
کہ خود بے چین ہیں ذوقِ نوا سے بزم فطرت کی

نقابِ رُخ اُلٹ کر آج کیوں گرمِ تبسّم ہو
شُعائیں مُجھ پہ کیوں پڑتی ہیں خورشیدِ قیامت کی

جہاں کی خیر ہو، جانِ حزِیں کی خیر ہو، یا رب
کہ لو اُونچی ہُوئی جاتی ہے اب سوزِ محبّت کی

میں رِندِ بادہ کش بھی، بے نیازِ جام و ساغر بھی
رگِ ہرتاک سے آتی ہے کِھنچکر میری قسمت کی

وہی بے تابیاں جانے، وہی یہ خستگی سمجھے
کہ جس نے آب و گِل میں شورشیں بھردیں محبّت کی

جہانِ گوہرِ مقصُود ابھی گہرائیوں میں ہے
نظر پہنچے گی کیا افتادۂ گردابِ حیرت کی

تِرے نغمے کی لے، اے مُطربِ آفت نوا کیا ہے
یہ موجِ برق ہے یا اِک چَمک دردِ محبّت کی

اُٹھا رکھّا ہے اُس نے اپنے جَلوے کو قیامت پر !
قیامت ہے وہ جَلوہ، اُس کو کیا حاجت قیامت کی

تکلّم ہے تِرا یا شعلۂ وادئ ایمن ہے !
تبسّم زیرِ لب ہے یا کلی کِھلتی ہے جنّت کی

یہ بن کر برق و باراں دیکھئے کیا کیا غضب ڈھائے
خمِ گردوں سے موجِ مے اُٹھی ہے کِس قیامت کی

طبیعت خود بخود آمادۂ وحشت تھی اے اصغر
ہوائے فصْلِ گُل نے اور بھی اُس پر قیامت کی

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٨٨)


جہاں میں چشمِ مہ و مہر باز رہنے دے

الہیٰ خاطرِ اہل نیاز رہنے دے
ذرا بُتوں کو بھی بندہ نواز رہنے دے

مجاز کا بھی حقِیقت سے ساز رہنے دے
یہ راز ہے، تو ذرا حُسنِ راز رہنے دے

دلِ حزِیں میں شرارے دبے ہوئے ہیں ابھی
خُدا کے واسطے، اے نے نواز رہنے دے

صنم کدے میں تجلّی کی تاب مُشکل ہے
حَرم میں شیخ کو مَحوِ نماز رہنے دے

خبر کِسی کو نہ ہوگی، کنارِشوق میں آ
جہاں میں چشمِ مہ و مہر باز رہنے دے

حیاتِ تازہ کی رنگینیاں نہ مِٹ جائیں
ابھی یہ مرحَلۂ غم دراز رہنے دے

فسُردہ دل ہُوں، کہاں ہے وہ آتشیں نغمہ
کہ پردہ رہنے دے کوئی نہ ساز رہنے دے

حریمِ ناز کے آداب اور ہیں اصغر
نیاز رکھ کے بھی عرضِ نیاز رہنے دے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٨٩)


یہ نظّارہ ہے یا ذوقِ نظر برباد ہوتا ہے

کوئی محمل نشِیں کیوں شاد یا ناشاد ہوتا ہے
غُبارِ قیس خود اُٹھتا ہے خود برباد ہوتا ہے

قفس کیا، حلقہ ہائےدام کیا، رنجِ اسِیری کیا ؟
چمن پر مِٹ گیا جو، ہرطرح آزاد ہوتا ہے

یہ سب ناآشنائے لذّتِ پرواز ہیں شاید !
اسِیروں میں ابھی تک شکوۂ صیّاد ہوتا ہے

بہارِ سبزہ وگُل ہے، کرَم ہوتا ہے ساقی کا
جواں ہوتی ہے دُنیا، میکدہ آباد ہوتا ہے

بنا لیتا ہے موجِ خُونِ دِل سے اِک چمن اپنا
وہ پابندِ قفس، جو فطرتاً آزاد ہوتا ہے

بہارانجام سمجُھوں اِس چمن کا یا خزاں سمجُھوں
زبانِ برگ و گُل سے مُجھ کو کیا اِرشاد ہوتا ہے؟

ازل سے اِک تجلّی سے ہُوئی تھی بیخودی طاری
تمہیں کو میں نے دیکھا تھا کچھ ایسا یاد ہوتا ہے

سمائے جا رہے ہیں اب وہ جَلوے دِیدہ و دِل میں
یہ نظّارہ ہے یا ذوقِ نظر برباد ہوتا ہے

زمانہ ہے کہ خُوگر ہورہا ہے شور و شیون کا
یہاں وہ درد، جو بے نالہ و فریاد ہوتا ہے

یہاں کوتاہئ ذوقِ عمل ہے خود گرفتاری
جہاں بازو سِمٹتے ہیں، وہیں صیّاد ہوتا ہے

یہاں مستوں کے سر الزامِ ہستی ہی نہیں اصغر
پھر اُس کے بعد ہر الزام بے بنیاد ہوتا ہے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩٠)


کھُلا ہے مُجھ پر یہ رازِ ہستی کہ مُجھ کو کچُھ بھی خبر نہیں ہے

مجاز کیسا؟ کہاں حقیقت، ابھی تُجھے کچھ خبر نہیں ہے
یہ سب ہے اِک خواب کی سی حالت، جو دیکھتا ہے سحرنہیں ہے

شمیمِ گلشن، نسیمِ صحرا، شُعاعِ خورشید، موج دریا
ہرایک گرمِ سفر ہے، اِن میں مِرا کوئی ہم سفر نہیں ہے

نظر میں وہ گُل سَما گیا ہے، تمام ہستی پہ چھا گیا ہے !
چمن میں ہُوں یا قفس میں ہُوں میں، مُجھے اب اِس کی خبرنہیں ہے

چَمک دَمک پر مِٹا ہُوا ہے، یہ باغباں تُجھ کو کیا ہُوا ہے؟
فریبِ شبنم میں مُبتلا ہے، چمن کی اب تک خبرنہیں ہے

یہ مُجھ سے سُن لے تُو رازِ پنہاں، سَلامتِی ہے خُود دُشمنِ جاں
کہاں سے رہرو میں زندگی ہو، کہ راہ جب پُر خطرنہیں ہے

میں سر سے پا تک ہُوں مے پَرستی، تمام شورش، تمام مستی
کھُلا ہے مُجھ پر یہ رازِ ہستی، کہ مُجھ کو کچُھ بھی خبرنہیں ہے

ہَوا کو موجِ شراب کردے، فضا کو مست و خراب کردے
یہ زندگی کو شباب کردے، نظر تمھاری نظرنہیں ہے

پڑا ہے کیا اُس کے در پہ اصغر، وہ شوخ مائل ہے امتحاں پر
ثبوت دے زندگی کا مرکر، نیاز اب کارگر نہیں ہے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩١)


کون ذرّہ ہے کہ سرشار محبّت میں نہیں

عکس کِس چیز کا آئینۂ حیرت میں نہیں
تیری صُورت میں ہے کیا جو مِری صُورت میں نہیں

دونوں عالم تِری نیرنگ ادائی کے نِثار
اب کوئی چیز یہاں جیبِ محبّت میں نہیں

دولتِ قُرب کو خاصانِ محبّت جانیں
چند اشکوں کے سِوا کچُھ مِری قِسمت میں نہیں

لوگ مرتے بھی ہیں، جیتے بھی ہیں، بیتاب بھی ہیں
کون سا سحر تِری چشمِ عِنایت میں نہیں

سب سے اِک طرزِ جُدا، سب سے اِک آہنگِ جُدا
رنگ محفِل میں تِرا جو ہے، وہ خلوت میں نہیں

نشۂ عِشق میں ہر چیز اُڑی جاتی ہے
کون ذرّہ ہے کہ سرشار محبّت میں نہیں

دعوئٰ دِید غلط ، دعوئٰ عِرفاں بھی غلط
کچُھ تجلّی کے سِوا چشمِ بصِیرت میں نہیں

ہو گئی جمع متاعِ غمِ حرماں کیونکر
میں سمجھتا تھا، کوئی پردۂ غفلت میں نہیں

ذرّے ذرّے میں کِیا جوشِ ترنّم پیدا
خود مگر کوئی نوا سازِمحبّت میں نہیں

نجْد کی سمت سے یہ شورِ انا لیلےٰ کیوں؟
شوخئ حُسن اگر پردۂ وحشت میں نہیں

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩٢)

اک لہو کی بُوند کیوں ہنگامہ آرا دِل میں ہے

عِشق کی فِطرت ازل سے حُسن کی منزِل میں ہے
قیس بھی محمل میں ہے، لیلیٰ اگر محمل میں ہے

جُستجُو ہے زندگی، ذوقِ طلب ہے زندگی
زندگی کا راز لیکن دُورئ منزِل میں ہے

لالہ و گُل تم نہیں ہو، ماہ و انجم تم نہیں !
رنگِ محفِل بن کے لیکن کون اِس محفِل میں ہے

اِس چَمن میں آگ برسے گی، کہ آئے گی بہار
اِک لہو کی بُوند کیوں ہنگامہ آرا دِل میں ہے

اُٹھ رہی ہے، مِٹ رہی ہے موجِ دریائے وجُود
اور کچُھ ذوقِ طلب میں ہے نہ کچُھ منزِل میں ہے

طوُر پہ لہرا کے جس نے پھُونک ڈالا طوُر کو !
اِک شرارِ شوق بن کر میرے آب و گِل میں ہے

محو ہو کر رہ گئی جو، ہے وہی راہِ طریق
جو قدم مستانہ پڑتا ہے وہی منزِل میں ہے

ہو کے رازِعِشق افشا بن گیا اِک راز دار
سب زباں پر آچکا ہے، سب ابھی تک دل میں ہے

عرش تک تو لے گیا تھا ساتھ اپنے حُسن کو
پھر نہیں معلوُم اب خودعِشق کِس منزِل میں ہے

اصغرِ افسُردہ ہے محرُومِ موجِ زندگی !
تُو نوائے رُوح پَروَر بَن کے کِس محفِل میں ہے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩٣)


لُطف جب ہے، اپنی دُنیا آپ پیدا کیجئے

حُسن بن کر خود کو عالم آشکارا کیجئے
پھر مُجھے پردہ بناکر مُجھ سے پردا کیجئے

اضطِرابِ غم سے ہے نشوونمائے زندگی
ہر نفس میں ایک تازہ درد پیدا کیجئے

کھُل گیا رنگِ حسیناں، کِھل گیا رنگِ چمن
کم سے کم اِتنا نظر میں حُسن پیدا کیجئے

عقل ہوغرقِ تجلّی، رُوح پا جائے جِلا !
بیٹھ کر اِک لحظہ شُغلِ جام و مِینا کیجئے

اِک دلِ بیتاب میں، پہلو میں پھر پیدا کرُوں
مُسکرا کر پھر ذرا مُجھ سے تقاضا کیجئے

پروَرِش پاتا ہے رگ رگ میں مزاجِ عاشِقی
جَلوہ پھر دِکھلایئے، پھر مُجھ سے پردا کیجئے

اِس جہانِ غیر میں آرام کیا، راحت کہاں
لُطف جب ہے، اپنی دُنیا آپ پیدا کیجئے

دیرسے بُھولے ہُوئے ہیں درسِ مستی اہلِ بزم
آج ہر موجِ نفس کو موجِ صہبا کیجئے

رِند اِدھر بیخود، اُدھر دیروحرم گرمِ طواف
عرش بھی اب جُھوم کرآتا ہے دیکھا کیجئے

دیکھتا ہُوں میں کہ اِنساں کُش ہے دریائے وجُود
خود حباب وموج بن کر اب تماشا کیجئے

حُسن کی بیگانگی و بے نیازی سب بجا
اُس پہ چھپ کرپردۂ گُل سے اِشارا کیجئے

ایک ہی ساغر میں اصغرکھُل گئی دِل کی گِرہ
رازِ ہستی بھی کھُلا جاتا ہے دیکھا کیجئے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩٤)

کہاں کھوئی ہُوئی ہے جرأتِ رِندانہ برسوں سے

خُدا جانے کہاں ہے اصغرِ دِیوانہ برسوں سے
کہ اُس کو ڈھونڈتے ہیں کعبہ و بُت خانہ برسوں سے

تڑپنا ہے نہ جلنا ہے، نہ جل کر خاک ہونا ہے
یہ کیوں سوئی ہُوئی ہے فِطرَتِ پروانہ برسوں سے

کوئی ایسا نہیں یا رب، کہ جو اِس درد کو سمجھے
نہیں معلوُم کیوں خاموش ہے دِیوانہ برسوں سے

کبھی سوزِ تجلّی سے اُسے نِسبت نہ تھی گویا
پڑی ہے اِس طرح خاکِسترِ پروانہ برسوں سے

تِرے قربان ساقی، اب وہ موجِ زندگی کیسی
نہیں دیکھی ادائے لغزشِ مستانہ برسوں سے

مِری رِندی عجب رِندی، مِری مستی عَجب مستی
کہ سب ٹُوٹے پڑے ہیں شیشہ و پیمانہ برسوں سے

حسِینوں پر نہ رنگ آیا، نہ پُھولوں میں بہار آئی
نہیں آیا جو لب پر نغمۂ مستانہ برسوں سے

کھُلی آنکھوں سے ہُوں حُسنِ حقِیقت دیکھنے والا
ہُوئی لیکن نہ توفیقِ درِ بُت خانہ برسوں سے

لباسِ زُہد پر پھر کاش نذرِ آتشِ صہبا
کہاں کھوئی ہُوئی ہے جرأتِ رِندانہ برسوں سے

جسے لینا ہو آکر اُس سے اب درسِ جنُوں لے لے
سُنا ہے ہوش میں ہے اصغرِ دِیوانہ برسوں سے

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩٥)
میں کہاں ہُوں کہ اُٹھائے گی قیامت مُجھ کو

دے مُسرّت مُجھے اورعین مُسرّت مُجھ کو
چاہیئے غم بھی بہ اندازۂ راحت مُجھ کو

جانِ مُشتاق مِری موجِ حوادث کے نِثار
جس نے ہر لحظہ دِیا درسِ محبّت مُجھ کو

خود میں اُٹھ جاؤں کہ یہ پردۂ ہستی اُٹّھے
دیکھنا ہے کِسی عُنواں تِری صُورت مُجھ کو

دلِ بے تاب میں ہنگامۂ محشر ہے بپا !
مار ڈالے نہ تِری چشمِ عِنایت مُجھ کو

آگئی سامنے اِک جلوۂ رنگیں کی بہار
عِشق نے آج دِکھا دی مِری صُورت مُجھ کو

نگہِ ناز کو، یہ بھی تو گوارا نہ ہُوا
اِک ذرا درد میں مِلنی تھی جو راحت مُجھ کو

آج ہی محو ہے خورشید میں ذرّہ ذرّہ
میں کہاں ہُوں کہ اُٹھائے گی قیامت مُجھ کو

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔

 

[طارق شاہ]

(٩٦)


ہم اہلِ راز سب رنگینئ مِینا سمجھتے ہیں


نمودِ حُسن کو حیرت میں ہم کیا کیا سمجھتے ہیں
کبھی جلوہ سمجھتے ہیں کبھی پردا سمجھتے ہیں

ہم اُس کو دِیں، اُسی کو حاصلِ دُنیا سجمھتے ہیں
مگرخودعِشق کواِس سے بھی بے پروا سمجھتے ہیں

کبھی ہیں محوِ دِید ایسے، سمجھ باقی نہیں رہتی
کبھی دِیدار سے محرُوم ہیں، اِتنا سمجھتے ہیں

یکایک توڑ ڈالا ساغرِ مے ہاتھ میں لے کر
مگر ہم بھی مزاجِ نرگسِ رعنا سمجھتے ہیں

کبھی گُل کہہ کے پردہ ڈال دیتے ہیں ہم اُس رُخ پر
کبھی مستی میں پھر گُل کو رُخِ زیبا سمجھتے ہیں

یہاں تو ایک پیغام جنُوں پہنچا ہے مستوں کو
اب اُن سے پُوچھئے دُنیا کو جو دُنیا سمجھتے ہیں

یہی تھوڑی سی مے ہے اور یہی چھوٹا سا پیمانہ
اِسی سے رِند رازِ گنبدِ مِینا سمجھتے ہیں

کبھی تو جستجُو جلوے کو بھی پردہ بتاتی ہے
کبھی ہم شوق میں پردے کو بھی جلوا سمجھتے ہیں

خوشا وہ دِن کہ حُسنِ یار سے جب عقل خِیرہ تھی
یہ سب محرُومیاں تھیں آج ہم جتنا سمجھتے ہیں

کبھی جوشِ جنُوں ایسا، کہ چھا جاتے ہیں صحرا پر
کبھی ذرّے میں گمُ ہوکر اُسے صحرا سمجھتے ہیں

یہ ذوقِ دِید کی شوخی وہ عکسِ رنگِ محبُوبی
نہ جلوہ ہے نہ پردہ، ہم اِسے تنہا سمجھتے ہیں

نظر بھی آشنا ہو نشۂ بے نقش و صُورت سے
ہم اہلِ راز سب رنگینئ مِینا سمجھتے ہیں

وہ نِگہت سے سِوا پنہاں، وہ گُل سے بھی سواعُریاں
یہ ہم ہیں جو کبھی پردہ ، کبھی جلوا سمجھتے ہیں

یہ جلوے کی فراوانی یہ ارزانی، یہ عُریانی
پھر اِس شدّت کی تابانی کو ہم پردا سمجھتے ہیں

دِکھا جلوہ، وہی غارت کُنِ جانِ حزِیں جلوہ
تِرے جلوے کے آگے جان کو ہم کیا سمھتے ہیں

زمانہ آرہا ہے جب اُسے سمجھیں گے سب اصغر
ابھی تو آپ خود کہتے ہیں، خود تنہا سمجھتے ہیں

۔۔۔ ۔۔۔ ۔۔۔ ۔۔۔ ۔۔۔ 00000۔۔۔ ۔۔۔ ۔۔۔ ۔۔۔ ۔۔