اوشو
لائبریرین
ایس لڑی وچ میں سائیں غلام حیدر جی دا کلام شیئر کراں گا۔ سب توں پہلاں تلمیذ جی دی فرمائش تے پیر فضل گجراتی ہوراں دی غزل تے اوسی زمین تے سائیں غلام حیدر جی دی کتاب "سدھراں دا گستان" چوں انتخاب۔
تلمیذ ، سید زبیر ، سید شہزاد ناصر ، محمد یعقوب آسی نایاب ، نیرنگ خیال ، عبدالقیوم چوہدری ، فلک شیر ، غدیر زھرا ، محمد اظہر نذیر ، نایاب
میں کیہڑی آپنے درداں دی دُنیاوچہ وساں کیہہ دساں
کس گلّے پیاں رو رو کے چہرے تے لسّاں کیہہ دساں
میں ٹریا جنگل بیلے نوں اوہ حَبل وریدوں نیڑے سی
اک پانے والےپایاں سن کجھ پُٹھیاں دسّاں کیہہ دساں
اوہ عشق نئیں جو لگ جائے تے گور اُریرے لہہ جائے
ایہہ چڑھیاں ہویاں فیر کدی لتھیاں نئیں کسّاں کیہہ دساں
رنگ کُھلا میری وحشت دا ہو کٹھے کجھ ہمدرد گئے
اوہ رو رو پُچھن حال میرا، میں کھڑ کھڑ ہسّاں کیہہ دساں
کیوں فضل سودائی ہویا ایں پلّے دیاں لیراں لاہیاں نی
پھڑ لوکی پلّہ پُچھدے نیں تے میں پلّہ کھساں کیہہ دساں
پیر فضل گجراتی
۔۔۔۔۔۔۔۔۔۔۔۔۔۔۔۔۔۔۔۔
انّاالحق دِی اوہ گل پُچھدے، میں پلڑا کھسّاں کیہ دسّاں؟
دسّاں تفسیر مُحبّت دِی؟ میں جانڑ کے پھسّاں کیہ دسّاں؟
ٹُٹنڑاں سہر ے دِیاں لڑیاں دا ،معصُوم اؤلاداں دا گُستان
کربل دے وِچ سیّداں نُوں، پانڑی دِیاں تسّاں کیہ دسّاں؟
ایہہ پیار تے کارو بار نئیں ،لالچ تے یاری جوڑ نئیں
مُلّاں دے وعظ نصِیحت توں ، میں کاہنُوں نسّاں کیہ دسّاں؟
دسّاں بے حالیاں حال دِیاں، گل کراں زمانےبِیتےدِی
جیؤں بدلی وسدِی اے ساونڑ دِی ، میں چھم چھم وسّاں کیہ دسّاں؟
مخمل دِیاں دریاں کمرے وِچ ، زر دار دے کُتّے کاراں تے
مزدُور دے بال دے جُثّے تے ، مِٹیاں تے بھسّاں کیہ دسّاں؟
" مسجد ،مندر ، گِرجے پھِریاں ، چور دِلے دے اندر سِی''
ہِک پانڑے والے پائیاں سن ، کُجھ پُٹھیاں دسّاں کیہ دسّاں؟
ایہہ خؤرے مُکھڑا کاہنُوں ایں ، ہر بندے دا زردیل جیہا
میں ہِک ہِکلّا دسّو جی ، کِس کِس نُوں دسّاں کیہ دسّاں؟
حالات ظفر دِی زِندگی دے ، سرمد دا قِصّہ سائیں حیدر
کیہ دسّاں درد پیاراں دے ، سُولی دِیاں چسّاں کیہ دسّاں؟
سائیں غلام حیدر سہوترہ
تلمیذ ، سید زبیر ، سید شہزاد ناصر ، محمد یعقوب آسی نایاب ، نیرنگ خیال ، عبدالقیوم چوہدری ، فلک شیر ، غدیر زھرا ، محمد اظہر نذیر ، نایاب
آخری تدوین:
