محترم بھائی
روحانی بابا
جزاک اللہ خیراء
آپ نے مجھے میری شخصیت ( جو کہ میری تحریر سے منعکس ہوتی ہے ) کے بارے
اک اہم آگہی سے نوازتے مجھے اپنی اصلاح کرنے کی جانب متوجہ کیا ۔
کوشش کروں گا کہ اپنے اس تحریری عکس ملال سے چھٹکارا حاصل کر لوں ۔
اور جہاں تک آپ نے اپنے بارے لکھا تو میرے محترم آپ نے صرف عذرخواہی کو اپناتے حقیقت پر پردہ ڈالا ہے ۔
نہ تو آپ کی تربیت میں کوئی کمی رہی ۔ نہ ہی آپ کا اکتساب نامکمل رہا ۔
یہ جو آپ کو اپنا لہجہ سخت اسلوب کٹیلا اور تحریر طنز و استہزاء کی محسوس ہوتی ہے ۔
یہ جو آپ نے اپنے غصے و طیش کو مخلوق کا خود سے چھن جانے کا سبب قرار دیا ہے ۔
یہ صرف آپ کا اپنا گمان ہے۔جو کہ آپ کی خود سے "پیوستگی " کے باعث سے ابھرا ہے ۔
اور اسی باعث نے آپ کے لاشعور میں ابھرنے والی " میں " کو مضبوطی عطا کی ہے ۔
جو آپ کو ہمیشہ " دار" پر چڑھے نمایاں رہنے پر مجبور کر دیتی ہے ۔
اور اس گمان کا ابھرنا اور آپ کا باطن کا آپ کو اس بارے معطون کرنا ہی آپ کے روشن ضمیر ہونے پر نص ہے ۔
اور اپنے تہی دامن رہ جانے کا احساس اس سچی حقیقت کا عکاس ہے کہ
قدرت دانے کو خاک میں ملا چہار عناصر کو اس کی ذات کی نفی میں مددگار ٹھہراتی ہے ۔
اور دانہ جب مکمل نفی کو پہنچ جاتا ہے تو اس میں سے وہ شجرنمودار ہوتا ہے۔
جو نہ صرف نسل انسانی بلکہ جملہ مخلوقات کے لیئے نفح کا سبب ہوتا ہے ۔
آپ نے بالکل درست کہا کہ (
کبھی کسی کو اس قابل سمجھا ہی نہیں کہ اس کا دامن پکڑ لیا جائے
)
کسی کو کیا تلاشنا کسی کا کیا دامن پکڑنا ۔ خود میں وہ صفت پیدا کرنی بہتر کہ کوئی ہمیں تلاشے ۔ ہمارے دامن سے لپٹے ۔
ہر چمکتی چیز کو جو سونا جان اس کے پیچھے خوار ہو وہ تو نا سمجھ کہلاتا ہے ۔
میرے محترم بھائی " بال کی کھال " اگر تو فلاح انسانیت کے جذبے سے ہو تو ہمہ وقت اس میں مصروف رہنا بہتر ۔
اور اگر مقصود وقت کا گزارا ہو تو پھر " گنے چوپنے سے بہتر کوئی عمل نہیں "
آپ جیئیں ہزاروں سال ۔ یار زندہ صحبت باقی ۔
جب تک زندہ ہیں کوئی ملاقات نہیں ہو سکتی آخری ۔۔۔۔۔۔۔۔۔۔۔۔۔۔
" نہ چھڑا سکو گے دامن " چاہے کوشش لاکھ کرو میرے محترم
