ماضی
یہ کہنہ محل، جس کے رنگیں دریچوں سے لپٹی ہوئی عشقِ پیچاں کی بیلیں
منڈیروں، ستونوں پہ پھیلی ہوئی سبز کائی
سرِ شام چلتے ہوئے سرد جھونکوں میں مسکاریاں بھر رہی ہے
جہاں اب ہوا، اُس کے پائیں چمن کے خزاں دیدہ پیڑوں کی شاخوں
پہ سرگوشیوں کے شگوفے کھلانے سے شرما رہی ہے
یہاں۔۔۔ ایک دن تھا کہ شیریں صداؤں کے جھنڈ
آرزوؤں کے بھٹکے ہوئے قافلوں کے لیے راحتوں کے نشاں تھے
یہاں ہر دریچہ
حسیں، ہمہماتے، وفا کیش چہروں کی آماجگہ تھا
یہ باغ ان گنت خوشبوؤں، چہچہاتے پرندوں،
گھنیرے درختوں کی اک دلنشیں جلوہ گہ تھا
یہ چپ چاپ سنگیں عمارت تب اتنی پُرانی نہیں تھی
مگر آج جس سمت دیکھو
نگاہوں کے کشکول میں
سوٗنے بام و در و سقف
سوکھے درختوں سے جھڑ کر گرے زرد پتّوں، چٹختی ہوئی ٹہنیوں کے سوا کچھ نہیں ہے!!