تحریرِ آبِ زرر۔۔ اعجاز عبید

[الف عین]

دو غزلہ ۔۔۔۔۔ دو
ایسا بربط کہ جو شکستہ نہیں
لیے بیٹھے ہیں اور نغمہ نہیں
اب تو موسم ہے برف باری کا
اب یہاں کوئی پھول ہنستا نہیں
اب تو چنگاریاں اتر آئیں
اب کہیں ’’ جگنوؤں کی دنیا‘‘1 نہیں
اب تو بس برف تیرتی ہے یہاں
اب کسی جھیل میں شکارہ نہیں
جو کسی صبح کی خبر دے دے
اب ان آنکھوں میں وہ ستارہ نہیں
کب سے ہے آنکھوں کے افق پہ محیط
ایسا بادل کہ جو برستا نہیں
میرے کالر میں بھی نہیں خوشبو
اس کے بالوں میں بھی وہ غنچہ نہیں
رات بھر میں اجڑ گئی بستی
صبح مندر گجر پکارا نہیں
(1) قرۃ العین حیدر کی ایک کہانی کا عنوان
1974ء

 

[الف عین]

ہوگئی ختم اک پورنماسی
دھیرے دھیرے ہوئے پھول باسی
وقت کیسا سنہرا سا مند
شام سیڑھی پہ اک دیوداسی
میری آنکھوں میں ساون تو اترے
یہ زمیں رہ گئی یوں ہی پیاسی
فصلِ گل کو ابھی کب تھا آنا
رنگ لاتی ہے یہ خوں لباسی

1974ء

 

[الف عین]

نگر نگر کی گلی گلی میں سناٹا تھا چپ
دھرتی پر اک پیڑ اکیلا، گگن پہ تارا چپ
پہلے ہنسانا چاہا، پھر مٹّی پر رکھ دئے پھول
اک بچّے کی آنکھوں میں آنسو، سہما سہما چپ
کیسے کہہ دوں اب نہ سنے گی وہ کوئی لوری
کیا جانے اب کیسے ہوگی ننھی گڑیا چپ
پیڑوں کے اس جھنڈ میں ہم کو کھوج رہا تھا کون
اس نے لبوں پر انگلی رکھ کر کیا اشارہ ’’چپ‘‘
میری دعا تھی۔ برسیں اب آکاش سے ساون گیت
ہر بادل میری نظروں سے گزرا تنہا ۔ چپ

1974ء

 

[الف عین]

رات بھر گیت یوں ہی گائیں گے ہم
کوئی ڈھونڈھے گا تو چھپ جائیں گے ہم
سن کے اک ڈوبتی آواز تری
آسمانوں سے اتر آئیں گے ہم
ماتمِ شہرِ تمنّا کے لیے
دو منٹ چپ کھڑے ہو جائیں گے ہم
محلِ ویراں کے ہیں آخر والی
اور اک روز گزر جائیں گے ہم
ہاں تجھے پا کے ملے گا سب کچھ
اک ترے خط کی کمی پائیں گے ہم
1974ء

 

[الف عین]

مجھے جو دور سے دیکھو تو فاصلہ بھی میں
مرے قریب سے گزرو تو راستہ بھی میں
تمام زرد مناظر کو سبز کر دوں گا
نہ ہو اداس درختو، وہ آئینہ بھی میں
عجب کشاکشِ پیہم ہیں روز شب میرے
میں آپ اپنا عدو بھی ہوں، آشنا بھی میں
خدا کی طرح بکھر جاؤں سارے منظر میں
کہ شاخِ سبز بھی، برگِ خزاں زدہ بھی میں
میں آپ خود سے ہی لڑ کر شکست کھاتا ہوں
نحیف پھول بھی میں، سر پھری ہوا بھی میں
نبھے گی خوب کہ شعلہ بھی ہے وہ شبنم بھی
عبیدؔ اس کے لیے آب بھی ہوا بھی میں

1974ء

 

[الف عین]

کچھ چلو اس کا مدعا نکلا
میں ہی کچھ مجرمِ وفا نکلا
رت جگا گرمیوں کی راتوں کا
کتنی صدیوں کا سلسلہ نکلا
قلعۂ چشم سے پھر آخر شب
جلتی شمعوں کا قافلہ نکلا
آج دیکھا تو دیدہ و دل میں
ایک لمحے کا فاصلہ نکلا
محورِ بازگشت سے باہر
جو بھی نکلا ۔ وہ بے نوا نکلا
یاد بھی کچھ دبی دبی آئی
چاند بھی کچھ بجھا بجھا نکلا
1975ء

 

[الف عین]

صلہ ملا تو نہیں کچھ مجھے وفا کر کے
مگر میں خوش ہوں یہی جرم بارہا کر کے
سوا مسیحا کسی کو بھی جاں سپرد نہ کی
میں مطمئن ہوں بہت فرض یہ ادا کر کے
کبھی بُجھی ہوئی آنکھوں میں نور تو مانگوں
کبھی تو دیکھوں درِ شب یہ بھی صدا کر کے
تمام چشم کو گلزارِ زخم کر دوں گا
مہیب رات کے لشکر کا سامنا کر کے
خدا کرے کہ سلامت ہوں ریت پر وہ نقوش
ہوا تھی تیز مگر دیکھ لوں دعا کر کے

1975ء

 

[الف عین]

فضا ہمیشہ نئے رنگ سے سنورتی ہے
ہر ایک صبح فلک سے نئی اترتی ہے
مرے لیے نہ کبھی خود کو تو تماشہ بنا
تری ہنسی مجھے بے حد اداس کرتی ہے
یہ وہ مقام ہے گریہ بھی جب نہیں ہوتا
یہیں کہیں یہ ندی ریت میں اترتی ہے
جہاں دریچوں میں گل انتظار کھلتے ہوں
وہاں ہوا بھی دبے پاؤں سے گزرتی ہے
کبھی چبھن ہی چبھن ، اور تمام رنگ کبھی
یہ رات ، شیشہ نُما، مجھ میں یوں بکھرتی ہے
سنور سنور کے اُجڑتے ہیں اس کے باشندے
اجڑ اجڑ کے یہ بستی مگر سنورتی ہے

1976ء

 

[الف عین]

کیا قہر ہے برسوں جو مرے ساتھ رہا بھی
اب اس سے نہیں رشتۂ تسلیم و دعا بھی
کیا شعلہ، دھواں کیا، کہ نہیں راکھ بھی باقی
کیوں ڈرتی ہے ہم سوختہ جانوں سے ہوا بھی
اک آخری پل ٹوٹتے رشتے کے لیے روئیں
مانا کہ حریفانہ سہی ، سامنے آ بھی
خود اپنے ہی بجھتے ہوئے شعلے کو جو بھڑکاؤں
اب میرے ہی دامن میں نہیں ایسی ہوا بھی
پھر ٹوٹ کے رویا، یہ مجھے علم تھا ورنہ
ہر فصلِ خزاں شاخ سے ہونا ہے جدا بھی
........................

1976ء

 

[الف عین]

جب جب بھی اس بستی میں ہم گیت سنانے آ جاتے ہیں
گلی گلی سے نکل نکل کر یار پرانے آ جاتے ہیں
شہرِ قاتلاں کی تہذیب میں جاں بخشی دستور نہیں
جانے ہیں، پر اپنا کیا ، بس رسم نبھانے آ جاتے ہیں
فرض ہی جب ٹھہرا تو پھر ہم یہ کیا دیکھیں کیا مورت ہے
شام ڈھلی اور ہم مندر میں دیپ جلانے آ جاتے ہیں
چاند سنور کر تو جب اس کے چہرے جیسا بن جاتا ہے
کتنے فسانے یاد اس رات میں تیرے بہانے آ جاتے ہیں
آؤ عبیدؔ جی! تم بھی ٹک کچھ بول لو، ہنس لو اس محفل میں
جتنے ہیں ہاں سبھی کسی نہ کسی کو بھلانے آ جاتے ہیں


1976ء

 

[الف عین]

ہم تو ہیں گو قیس ابی عامر نہیں، لیلیٰ نہیں
گاہے گاہے باز خواں ایں قصہ پارینہ نہیں
شعر کہنا بھی ستم ہے اور نہ کہنا بھی محال
کیا مصیبت ہے خود اپنے غم کا اندازہ نہیں
صبح مشرق میں کہاں لڑتی ہے کرنوں کی سپاہ
پردۂ شب کے پرے جا کر کبھی دیکھا نہیں
جانے یہ کیسا افق ہے، جانے کیسا آسماں
ایسا بادل چھا گیا جو آج تک برسا نہیں
ایسے ہنس کر پیار سے اس نے خدا حافظ کہا
جی بہت چاہا تھا رونے کا، مگر رویا نہیں

1976ء

 

[الف عین]

سینت کر رکھ لیں، تو جانیں کہ ہُنر اپنا ہے
بس یہی وقت کہ ۔۔۔ جو ثانیہ بھر اپنا ہے
اک شرر سے جو جلا، دشت وہی تھا اپنا
اب جو یہ دشت جلا ہے، تو شرر اپنا ہے
صرف اک کاسۂ جاں ہے سو ہے وہ بھی خالی
بس یہی باقیہ سامان سفر اپنا ہے
اس سے کیا رات کو بے خواب رہیں گی آنکھیں
ہم تو بس جانتے ہیں، خوابِ سحر اپنا ہے
ہاتھ خالی ہیں ہمارے سبھی ہتھیاروں کے بیچ
قافلے والوں کو کیا کہیے کہ ڈر اپنا ہے
کوئی نقشہ ہے نہ کچھ سمت نما ساتھ اپنے
اب جو نکلے تو یہ انداز سفر اپنا ہے

1976ء

 

[الف عین]

ان سوختہ آنکھوں میں کیا ہے کہ درخشاں ہے
کچھ کہتے ہیں آنسو ہے، کچھ کہتے ہیں ارماں ہے
ہر روز ہی آنکھوں میں بے خوابی کی ہولی ہے
ہر رات ہے دیوالی ہر رات چراغاں ہے
میں نے تو سبھی فصلیں کھلیانوں میں رکھ دی تھیں
لیکن یہ نہالِ غم صرصر میں بھی رقصاں ہے
جیسے کھنے جنگل میں جگنوؤں کا ڈیرہ ہو
اس طرح کچھ آنکھوں میں اشکوں سے چراغاں ہے
کچھ اس کے بھی ہونٹوں پر اب تک ہے مہک باقی
کچھ اب بھی مرے لب پر اک شمع روزاں ہے
جس زاویے سے دیکھو کچھ اور ہی لگتا ہے
اس کا بھی بدن کیا ہے، اک بھول بھلیاں ہے

1976ء

 

[الف عین]

کہاں وہ ہم کہ رہے کیسے شعلہ جاں اب تک
بُجھے بھی ایسے، فضاؤں میں ہے دھواں اب تک
ہوا چلی تو بہت دور تک بکھیر گئی
وہ بوئے راز تھی اک پھول میں نہاں اب تک
ہزار دن میں لہو رو کرے۔ پہ شب، تارے
ہمارے سر پہ سجاتا ہے آسماں اب تک
عجب ہے عشق کا سودا دکانِ دنیا میں
دیا تھا سود جو جاں کا، تو ہے زباں اب تک
کنواں بھی سوکھ گیا ، چُپ ہوئے گھڑے بھی مگر
کبھی اندھیرے میں بجتی ہیں چوڑباں اب تک

1976ء

 

[الف عین]

رنگ و بو کی فضائیں کیا کیا ہیں
زخمِ دل کی قبائیں کیا کیا ہیں
کچھ برستا نہیں مگر دل پر
ابر کیا کیا گھٹائیں کیا کیا ہیں
کھُل گئیں کیسی کیسی دستاریں
سر سے اتری رِدائیں کیا کیا ہیں
کس کا آنگن چمن بنا ہوگا
اس کی رنگیں قبائیں کیا کیا ہیں
ہم ہی شہرِ وفا میں بیں کہ یہاں
خوف کیا کیا، بلائیں کیا کیا ہیں
دل کو خوں کر کے شعر کہئے عبیدؔ
عاشقی کی سزائیں کیا کیا ہیں

1976ء

 

[الف عین]

سیم و زر رکھئے، بہت لعل و جواہر رکھئے
رکھئے رکھئے مرے دیواں کے برابر رکھئے
یوں نہ ہو وقت جو پڑجائے تو خالی نکلے
اپنی آنکھوں کے خزانے کو بچا کر رکھئے
پھول مرجھانے پہ خوشبو نہیں دیتے صاحب
اپنے بالوں میں مرے ہونٹ سجا کر رکھئے
شعر کہنے کو سلگنا ہی نہیں ہے کافی
آنکھ میں جھیل، تو سینے میں سمندر رکھئے
دل وہ اوسر ہے یہاں زخموں کی کھیتی کے لیے
آنسوؤں سے اسے ہر لمحہ بھگو کر رکھئے
ایک دیوانہ پھرے ہے کہ جسے عشق کہیں
رات بے رات قدم گھر سے نہ باہر رکھئے

1976ء

 

[الف عین]

کیا نسیم سحر ہے، صرصر کیا
علم کچھ بھی نہیں ہے باہر کیا
سرحدیں کچھ نہیں ہیں ان کے لیے
بارشوں کو گلی بھی کیا، گھر کیا
پیاس پر اختیار اب نہ رہا
ابر کیا، ریت کیا، سمندر کیا
یہ ہوائیں اڑا کے لائی ہیں
دشت کی آگ میرے اندر کیا؟
خوشبوئیں پھِر رہی ہیں آوارہ
شہر کیا، جنگلوں کے منظر کیا
اپنے نیزے پہ باندھ لوں رومال
اس طرف آئے گا یہ لشکر کیا ؟
سارے موسم کو چپ لگی ہے عبیدؔ
کوئی آئے گا اب مرے گھر کیا

1976ء

 

[الف عین]

فصل آئی، زخم پھر تازے لگے
ہر طرف خوشبو اڑی، غازے لگے
کیا میں بھرّائے گلے سے بولتا
ہاں مرے چہرے سے اندازے لگے
رات بھر کوئی نہیں آیا یہاں
صبح ہوتے گھر کے دروازے لگے
میں تو ایسا عشق میں گم بھی نہ تھا
جانے پھر کیوں مجھ پر آوازے لگے
بزم میں آیا تو تھے کیا کیا گماں
اب اٹھا بھی ہوں تو اندازے لگے
1976ء

 

[الف عین]

بچھڑنے کو اک اور ہار آگیا ہے پھر کوئی
لو ہم سے خوش مزاج کو رلا گیا ہے پھر کوئی
غبار در غبار میری رہگزارِ چشم سے
یہ کن گئے دنوں کا قافلہ گیا ہے پھر کوئی
عجب اداس تھی فضا ، عجب ملول ہم بھی تھے
اور ایسی دھندلی شام یاد آگیا ہے پھر کوئی
نہ آنے دے گا دھوپ ہی، نہ خود ہی کھُل کے برسے گا
ہماری آنکھوں میں اک ابر چھا گیا ہے پھر کوئی
یہ کیا غبار ہے کہ جس نے تجھ کو بھی چھپا لیا
کہ میرے تیرے درمیان آ گیا ہے پھر کوئی
نکل کے دیکھا دیر تک ۔ تو دور تک کوئی نہ تھا
یہ شاخِ خواب جانے کیوں ہلا گیا ہے پھر کوئی

1976ء

 

[الف عین]

ختم شد
ٌٌٌٌ8888888/////////////////
ٌٌٌٌٌٌٌٌٌ88888