بے نسب درہم و دینار کا ورثہ کیسا

[ظہیراحمدظہیر]

بے نسب درہم و دینار کا ورثہ کیسا
ہم نہ اپنائیں جو میراث تو حصہ کیسا

نام کی تختی لگانے سے نہ ہوگا ثابت
تم جو گھر پر نہیں موجود تو قبضہ کیسا

دوستی آگ سے کاغذ کی جلادےگی شہر
پھول رکھئے کف قرطاس پہ شعلہ کیسا​

میں فقط میں ہوں مجھے نسبتِ الفاظ سے جان
مسلکِ لوح و قلم میں کوئی فرقہ کیسا

دو دو چہرے ہیں مگر کوئی پرکھتا ہی نہیں
چل رہا ہے سر ِ بازار یہ سکہ کیسا

حرفِ حق پر نہ کٹے گردنِ پندار تو پھر
سجدۂ شب کا جبیں پر کوئی دھبہ کیسا

پُر فتن عہد ہے، بس روح کو رکھنا آباد
جان جانی ہے تو پھر جان کا خطرہ کیسا

بات پرکھو ، لبِ گفتار نہ پرکھو لوگو !
بات سچی ہے تو سچائی کا شجرہ کیسا

ظلم جو بھی کرے تردید ضروری ہے ظہیر
ظلم اندھیرا ہے تو پھر ظلم کا چہرہ کیسا

ظہیراحمد ظہیر ۔۔۔۔۔۔۔۔ ۲۰۱۰
​

فاتح سید عاطف علی کاشف اختر محمد تابش صدیقی

 

[فاتح]

واہ واہ بہت خوب حضور۔۔۔
اس شعر کے تو کیا ہی کہنے
حرفِ حق پر نہ کٹے گردنِ پندار تو پھر
سجدۂ شب کا جبیں پر کوئی دھبہ کیسا

 

[کاشف اختر]

بہت خوب ظہیر بھائی! واہ واہ واہ

 

[حمیرا عدنان]

نام کی تختی لگانے سے نہ ہوگا ثابت
تم جو گھر پر نہیں موجود تو قبضہ کیسا

واہہہہہ بہت خوب کیا کہنا ظہیر بھائی

 

[سارہ خان]

سب ہی اشعار ایک سے بڑھ کر ایک ۔۔۔

 

[محمد تابش صدیقی]

کیا کہنے ظہیر بھائی

حرفِ حق پر نہ کٹے گردنِ پندار تو پھر
سجدۂ شب کا جبیں پر کوئی دھبہ کیسا

بات پرکھو ، لبِ گفتار نہ پرکھو لوگو !
بات سچی ہے تو سچائی کا شجرہ کیسا