نمرہ
محفلین
یہ مایوسی دل و جاں نالہء شب گیر تو کھینچو
کھنچے گا اس کا دل، آہِ فسوں تاثیر تو کھینچو
شفیعِ بے گناہاں ہے نزاکت اس کلائی کی
بھلا خوں تو کرو گے، پہلے تم شمشیر تو کھینچو
سبک روحِ تجرد بھی کہیں پابند ہوتا ہے
شمیمِ گل کی نقاشو بھلا تصویر تو کھینچو
وہ آئے یا نہ آئے، زیست میری ہو نہ ہو لیکن
فغاں سے پیش تر تم خجلتِ تقریر تو کھینچو
سرِ زور آزمائی جذبِ دل کو آج ہی دیکھو
کھنچے گا ہاتھ سینے سے، تم اپنا تیر تو کھینچو
عبث نالش ہے آہِ تیرہ روزِ چشم جادو کی
دہاں بندِ ہوس سرمے کی اک تحریر تو کھینچو
دکھا دوں گا تماشا، بس نہ چھیڑو مجھ سے مجنوں کو
ہلا دوں گا زمین و آسماں ، زنجیر تو کھینچو
کہاں اس نوجواں کے ناز کی طاقت تمھیں مومن
ابھی سر مشق نو ہو، جورِ چرخِ پیر تو کھینچو
