ہنگامِ ثنا بارشِ انوار تو دیکھو - حافظ لدھیانوی

[الف نظامی]

ہنگامِ ثنا بارشِ انوار تو دیکھو
لطف و کرمِ سیدِ ابرار تو دیکھو

ہر تشنہ دیدار کو سیراب کیا ہے
فیضِ نگہ احمد مختار تو دیکھو

بھٹکے ہوئے اسان کو منزل کا نشاں ہے
نقشِ قدمِ قافلہ سالار تو دیکھو

انعام کی صورت بھی ہے تسکین نظر بھی
ہے خلد نشاں سایہ دیوار تو دیکھو

سائل ہیں شہنشاہ ، فقیرانِ حرم کے
وابستگی دامنِ سرکار تو دیکھو

ہر ذرہ ہے آئینہ انوار الہی
اے ہمسفرو! راہ کے آثار تو دیکھو

حافظ سا گنہگار بھی ہے حاضرِ دربار
اے ہم نفسو! طالع بیدار تو دیکھو

(حافظ لدھیانوی)​