مریم افتخار: تُسی وی سائنس دی فیلڈ وچ او اَتے پنجابی وی او، تُسی پنجابی دے ودھا بارے کیہ سوچدے او ؟
بڑا ودھیا سوال کیتا اے جی تسی تے مینوں ایس بارےسوچن دا موقع وی دتا اے۔
گل ایہہ اے کہ میں بچپن توں ایہہ سوچدی آں کہ ساڈے وڈیاں دی بدولت اسیں آں تے اسیں ہولی ہولی او زبان ای بولنو چھڈ دتی جیدھے توں علاوہ انہاں نوں شاید کوئی زبان آندی وی نہ ہووے۔ فیر بزرگاں نال ایک رابطہ تے ٹٹ گیا ناں۔ چاہے او سارے حیات نئیں، فیر وی کوش تے ہناں چاہیدا کہ انہاں دیاں روحاں ویکھدیاں ہون تے میں اینی اجنبی نہ لگاں۔
ساڈے خاندان وچ ہن ساڈی پیڑھی پنجابی گھٹ بولدی اے۔ بلکہ شاید ہی کوئی بولدا ہووے۔ گھروں باہر تے اوداں ای کڑیاں پنجابی بولدیاں گھٹ ای کدی ویکھیاں۔ منڈے فیر وی بولدے ہوون گے۔میں پنجابی دے بارے وچ بس ایہہ کیتا کہ میں اینہوں بولنا نئیں چھڈیا۔ میں جیہڑے گھر ویاہی گئی آں او وی پنجابی کدی نئیں بولدے۔ فیر میرا طریقہ ایہہ نئیں کہ کتے دھکے نال بولی جاواں، بلکہ میں اوتھے اندروں پنجابی کڈھدی آں جتھے دوجے پاسے پنجابی دا چاء ہووے۔اپنے بھراواں نال، ماں باپ تے دادا جی نال، چاچو تے پھپھیاں تے انہاں دے بچیاں نال۔ہن ایتھے فورم تے وی دو تین لوگ ہے جنہاں دے نال پنجابی بول کے مزا آندا اے۔
میں ایدھے توں علاوہ پنجابی لئی کجھ نئیں کیتا کہ میں جداں دے وی حالات سی اینہوں بولنا نئیں چھڈیا تے نہ ہی چھڈنا اے ان شاء اللہ۔ مینوں جیہڑا پنجابی زبان وچ احساس ہندا اے مادری ربط دا اپنے لوکاں نال او کسے ہور زبان وچ نئیں ہندا۔ جداں کہندے آ نا کہ گال تے جگت اپنی مادری زبان دی چنگی لگدی اے۔
باقی میں پنجابی دے کجھ کلام یا شاعری سندی پڑھدی رہنی آں تے ایک گل ہور دساں، جدوں میں برطانیہ سی تے میں غور کیتا کہ کوئی پنجابی میوزک کتوں دوروں وی مینوں اینا متوجہ کر دیندا سی کہ بس اخیر ای ہوگئی۔ کھچ تے ہے اے، بس میں ایناں یقین نئین رکھدی کہ جتھے دوجی زبان آلے وی ہون اوتھے وی لازمی پنجابی بولیے۔ انکلوسیویٹئ لیانی چاہیدی اے۔ ایہہ وڈیاں لیڈراں دی خوبی اے!
