طارق شاہ
محفلین
غزل
کنْور مہندرسِنگھ بیدی سحر
فِکرِعُقبٰی بھی نہیں ہے، غَمِ دُنیا بھی نہیں
اِس سے تسکِیں ہو میسّر مجھے ایسا بھی نہیں
وائے وہ عالَمِ بے کیف، کہ جس عالَم میں
ہم تماشا بھی نہیں، محوِ تماشا بھی نہیں
سعئئ اِخفائے محبّت کی بھی حد ہوتی ہے
اِس طرح بیٹھے ہیں، جیسے مجھے دیکھا بھی نہیں
بارِ خاطر ہیں تو محفِل سے چلے جاتے ہیں
ہم تماشائی نہیں ہیں، تو تماشا بھی نہیں
کرَمِ خاص نہ تھا تو بھی جئے جاتے تھے
اب ہے دُشوار، کہ اب رنجشِ بَیجا بھی نہیں
یہ بَجا، ترکِ تمنّا سے سُکوں مِلتا ہے
اِس قدر سہْل مگر ترکِ تمنّا بھی نہیں
اشک آ آ کے رُکے جاتے ہیں مِژگاں پہ سِحر
یہ وہ بادل ہے جو کُھل کر کبھی برسا بھی نہیں
کنْورمہندرسِنگھ بیدی سحر