جوش کسان - جوش ملیح آبادی

[حسان خان]

جھٹپٹے کا نرم رَو دریا، شفق کا اضطراب​

کھیتیاں، میدان، خاموشی، غروبِ آفتاب​

​

دشت کے کام و دہن کو، دن کی تلخی سے فراغ​

دور، دریا کے کنارے، دھندلے دھندلے سے چراغ​

​

زیرِ لب، ارض و سما میں، باہمی گفت و شنود​

مشعلِ گردوں کے بجھ جانے سے اک ہلکا سا دود​

​

وسعتیں میدان کی، سورج کے چھپ جانے سے تنگ​

سبزۂ افسردہ پر، خواب آفریں ہلکا سا رنگ​

​

خامشی اور خامشی میں سنسناہٹ کی صدا​

شام کی خنکی سے گویا دن کی گرمی کا گِلا​

​

اپنے دامن کو برابر قطع سا کرتا ہوا​

تیرگی میں کھیتیوں کے درمیاں کا فاصلا​

​

خار و خس پر ایک درد انگیز افسانے کی شان​

بامِ گردوں پر کسی کے روٹھ کر جانے کی شان​

​

دُوب کی خوشبو میں شبنم کی نمی سے اک سرور​

چرخ پر بادل، زمیں پر تتلیاں، سر پر طیور​

​

پارہ پارہ ابر، سرخی، سرخیوں میں کچھ دھواں​

بھولی بھٹکی سی زمیں، کھویا ہوا سا آسماں​

​

پتیاں مخمور، کلیاں آنکھ جھپکاتی ہوئی​

نرم جاں پودوں کو گویا نیند سی آتی ہوئی​

​

یہ سماں، اور اک قوی انسان، یعنی کاشتکار​

ارتقا کا پیشوا، تہذیب کا پروردگار​

​

طفلِ باراں، تاجدارِ خاک، امیرِ بوستاں​

ماہرِ آئینِ قدرت، ناظمِ بزمِ جہاں​

​

ناظرِ گل، پاسبانِ رنگ و بو، گلشن پناہ​

ناز پرور لہلہاتی کھیتیوں کا بادشاہ​

​

وارثِ اسرارِ فطرت، فاتحِ امید و بیم​

محرمِ آثارِ باراں، واقفِ طبعِ نسیم​

​

صبح کا فرزند، خورشیدِ زر افشاں کا عَلَم​

محنتِ پیہم کا 'پیماں'، سخت کوشی کی قسم​

​

جلوۂ قدرت کا شاہد، حسنِ فطرت کا گواہ​

ماہ کا دل، مہرِ عالم تاب کا نورِ نگاہ​

​

قلب پر جس کے نمایاں نور و ظلمت کا نظام​

منکشف جس کی فراست پر مزاجِ صبح و شام​

​

خون ہے جس کی جوانی کا بہارِ روزگار​

جس کے اشکوں پر، فراغت کے تبسم کا مدار​

​

جس کی محنت کا عرَق تیار کرتا ہے شراب​

اُڑ کے جس کا رنگ بن جاتا ہے جاں پرور گلاب​

​

قلبِ آہن جس کے نقشِ پا سے ہوتا ہے رقیق​

شعلہ خو جھونکوں کا ہمدم، تیز کرنوں کا رفیق​

​

خون جس کا بجلیوں کی انجمن میں باریاب​

جس کے سر پر جگمگاتی ہے کلاہِ آفتاب​

​

لہر کھاتا ہے رگِ خاشاک میں جس کا لہو​

جس کے دل کی آنچ بن جاتی ہے سیلِ رنگ و بو​

​

دوڑتی ہے رات کو جس کی نظر افلاک پر​

دن کو جس کی انگلیاں رہتی ہیں نبضِ خاک پر​

​

جس کی جاں کاہی سے ٹپکاتی ہے امرت نبضِ خاک​

جس کے دم سے لالہ و گل، بن کے اتراتی ہے خاک​

​

سازِ دولت کو عطا کرتی ہے نغمے جس کی آہ!​

مانگتا ہے بھیک تابانی کی جس سے روئے شاہ​

​

خون جس کا دوڑتا ہے نبضِ استقلال میں​

لوچ بھر دیتا ہے جو شہزادیوں کی چال میں​

​

جس کے ماتھے کے پسینے سے پئے عزّ و وقار​

کرتی ہے دریوزۂ تابش کلاہِ تاجدار​

​

سرنگوں رہتی ہیں جس سے قوتیں تخریب کی​

جس کے بوتے پر لچکتی ہے کمر تہذیب کی​

​

جس کی محنت سے پھبکتا ہے تن آسانی کا باغ​

جس کی ظلمت کی ہتھیلی پر تمدن کا چراغ​

​

جس کے بازو کی صلابت پر نزاکت کا مدار​

جس کے کَس بل پر اکڑتا ہے غرورِ شہریار​

​

دھوپ کے جھلسے ہوئے رخ پر مشقت کے نشاں​

کھیت سے پھیرے ہوئے منہ، گھر کی جانب ہے رواں​

​

ٹوکرا سر پر، بغل میں پھاوڑا، تیوری پہ بل​

سامنے بیلوں کی جوڑی، دوش پر مضبوط ہل​

​

کون ہَل؟ ظلمت شکن قندیلِ بزمِ آب و گِل​

قصرِ گلشن کا دریچہ، سینۂ گیتی کا دل​

​

خوش نما شہروں کا بانی، رازِ فطرت کا سراغ​

خاندانِ تیغِ جوہردار کا چشم و چراغ​

​

دھار پر جس کی چمن پرور شگوفوں کا نظام​

شامِ زیرِ ارض کو صبحِ درخشاں کا پیام​

​

ڈوبتا ہے خاک میں جو روح دوڑاتا ہوا​

مضمحل ذروں کی موسیقی کو چونکاتا ہوا​

​

جس کے چھو جاتے ہی مثلِ نازنینِ مہ جبیں​

کروٹوں پر کروٹیں لیتی ہے لیلائے زمیں​

​

پردہ ہائے خواب ہو جاتے ہیں جس سے چاک چاک​

مسکرا کر اپنی چادر کو ہٹا دیتی ہے خاک​

​

جس کی تابش میں درخشانی ہلالِ عید کی​

خاک کے مایوس مطلع پر کرن امید کی​

​

جس کا مَس خاشاک میں بُنتا ہے اک چادر مہین​

جس کا لوہا مان کر، سونا اگلتی ہے زمین​

​

ہَل پہ دہقاں کے چمکتی ہیں شفق کی سرخیاں ​

اور دہقاں سر جھکائے گھر کی جانب ہے رواں​

​

اُس سیاسی رتھ کے پہیوں پر جمائے ہے نظر​

جس میں آ جاتی ہے تیزی کھیتیوں کو روند کر​

​

اپنی دولت کو جگر پر تیرِ غم کھاتے ہوئے​

دیکھتا ہے ملکِ دشمن کی طرف جاتے ہوئے​

​

قطع ہوتی ہی نہیں تاریکئ حرماں سے راہ​

فاقہ کش بچوں کے دھندلے آنسوؤں پر ہے نگاہ​

​

پھر رہا ہے خوں چکاں آنکھوں کے نیچے بار بار​

گھر کی ناامید دیوی کا شبابِ سوگوار​

​

سوچتا جاتا ہے کن آنکھوں سے دیکھا جائے گا​

بے ردا بیوی کا سر، بچوں کا منہ اترا ہوا​

​

سیم و زر، نان و نمک، آب و غذا، کچھ بھی نہیں​

گھر میں اک خاموش ماتم کے سوا کچھ بھی نہیں​

​

ایک دل، اور یہ ہجومِ سوگواری! ہائے ہائے​

یہ ستم، اے سنگ دل سرمایہ داری ہائے ہائے​

​

تیری آنکھوں میں ہیں غلطاں وہ شقاوت کے شرار​

جن کے آگے خنجرِ چنگیز کی مڑتی ہے دھار​

​

بے کسوں کے خون میں ڈوبے ہوئے ہیں تیرے ہات​

کیا چبا ڈالے گی او کم بخت! ساری کائنات؟​

​

ظلم، اور اتنا! کوئی حد بھی ہے اِس طوفان کی​

بوٹیاں ہیں تیرے جبڑوں میں غریب انسان کی​

​

دیکھ کر تیرے ستم، اے حامئ امن و اماں!​

گرگ رہ جاتے ہیں دانتوں میں دبا کر انگلیاں​

​

ادّعائے پیروئ دین و ایماں، اور تُو!​

دیکھ اپنی کہنیاں، جن سے ٹپکتا ہے لہو​

​

ہاں سنبھل جا اب کے زہرے اہلِ دل کے آب ہیں​

کتنے طوفاں تیری کشتی کے لیے بے تاب ہیں​

​

(جوش ملیح آبادی)​

۱۹۲۹ء​

 

[مہدی نقوی حجاز]

واہ!
اتفاق سے میں نے ایک ہفتے پہلے ہی نکال کر پڑھی تھی (فال نکالنے کے انداز میں)

 

[نایاب]

بہت خوب شراکت

 

[طارق شاہ]

جوش صاحب کی کیا بات ہو!

تشکّر شیئر کرنے پر
بہت خوش رہیں