جوش پیغمبرِ فطرت - جوش ملیح آبادی

[حسان خان]

تاروں نے جھلملا کے جو چھیڑا ستارِ صبح​

گانے لگی چمن میں نسیمِ بہارِ صبح​

غنچوں کی چشمِ ناز سے ٹپکا خمارِ صبح​

ابھرا افق سے جامِ زمرّد نگارِ صبح​

شاعر کی روح، عشق کی ہمراز ہو گئی​

دنیا تمام جلوہ گہہِ ناز ہو گئی​

​

شمعیں ہوئیں خموش، چہکنے لگے طیور​

الٹی نقاب چرخ نے، جھلکا زمیں پہ طُور​

سینوں میں اہلِ دل کے ہوئے قلب چُور چُور​

آنکھوں سے رُخ پہ دوڑ گیا آنسوؤں کا نور​

دریا بہے، چٹک گئیں کلیاں گلاب کی​

پھوٹی کچھ اِس ادا سے کرن آفتاب کی​

​

سبزے پہ لہر آئی، جنوں خیز ہو گیا​

جھونکا ہر اک نسیم کا گل ریز ہو گیا​

شب کا سکوت لحنِ دل آویز ہو گیا​

رنگِ حیات ولولہ انگیز ہو گیا​

تنویر خندہ زن ہوئی تاریک رات پر​

حسنِ ازل کی چھوٹ پڑی کائنات پر​

​

بادِ سحر کے جام پہ قرباں ہزار جَم​

دامن تمام شبنمِ تازہ سے جس کا نم​

جھونکے نہیں یہ چرخ سے ہے بارشِ کرم​

ہر سانس غسل دیتی ہے سینے کو دم بدم​

تھی روح میں جو شب کی کثافت، وہ دھل گئی​

گہری جو سانس لی، تو گرہ دل کی کھل گئی​

​

وارفتگی کی سینۂ مشرق میں ہے امنگ​

ہر چیز میں حیات کی پیدا ہے اک ترنگ​

گردوں کی آب و تاب سے ہوتی ہے عقل دنگ​

ہلکا سا ابر، ابر میں یہ چمپئی سا رنگ​

جامِ زمردیں میں ہیں موجیں شراب کی​

شبنم میں چبھ رہی ہے کرن آفتاب کی​

​

دولہا بنے ہوئے ہیں شگوفوں سے بوستاں​

کندن بنی ہوئی ہیں پہاڑوں کی چوٹیاں​

تاروں کا بزمِ چرخ پہ باقی نہیں نشاں​

آنکھیں ہیں بند، ساکت و صامت ہے آسماں​

ہاتھوں پہ آفتابِ درخشاں لیے ہوئے​

حسنِ ازل کا دل میں تصور کیے ہوئے​

​

رقصاں ہے بحر، انجمنِ آفتاب میں​

جس طرح روحِ سُکر ہو موجِ شراب میں​

لہریں ہیں یا ہے زلفِ دوتا پیچ و تاب میں​

غلطاں ہے روح، بادِ صبا کی حباب میں​

موجیں رواں ہوئی ہیں کچھ اس سوز و ساز سے​

جس طرح کوئی چونک پڑے خوابِ ناز سے​

​

شمعیں بجھاتی آئی ہے ٹھنڈی ہوا کی رَو​

پروانے سرنگوں ہیں دھواں دے رہی ہے لَو​

یہ وادیوں میں پھیل رہی ہے سحر کی ضَو​

یا آ رہی ہے سر کو جھکائے عروسِ نَو​

آنکھوں میں دل فریب تبسم لیے ہوئے​

کاکُل ہے چشمِ سرخ پہ سایہ کیے ہوئے​

​

اے جوش! دیکھ غور سے، یہ رقصِ رنگ و بو​

تھی کب سے تجھ کو پرتوِ جاناں کی آرزو​

ہاں دیکھ! یہ تبسمِ گل، نازِ آب جو​

کُوکُو کی یہ صدائے دل افروز کُو بکُو​

آنکھیں اٹھا، علاجِ دلِ دردمند کر​

پیہم صدائیں صلِ علیٰ کی بلند کر​

​

یہ صحنِ گلستاں میں ہری دُوب کی ادا​

یہ وادیوں کی اوس میں ڈوبی ہوئی ہوا​

یہ کوئلوں کی کوک، پپیہے کی یہ صدا​

رخسارِ گل پہ رنگ، یہ ہلکا سا دھوپ کا​

رنگینیاں یہ سلسلۂ کوہسار کی​

یہ تنگ گھاٹیوں میں صدا آبشار کی​

​

یہ آب و تابِ چادرِ آبِ رواں، یہ نور​

نزہت کا یہ ہجوم، لطافت کا یہ وفور​

یہ دامنِ نسیم میں، سرمایۂ سرور​

بکھرے ہوئے زمین پہ موتی یہ دور دور​

یہ جھلکیاں سی پردۂ عظمت میں نور کی​

یہ معرفت میں غرق، صدائیں طیور کی​

​

کچھ کہہ کے نجمِ صبح سے یہ الوداعِ ماہ​

یہ کنج کی نسیمِ خنک، یہ ہری گیاہ​

یہ نہر کی تڑپ کہ ٹھہرتی نہیں نگاہ​

یہ پنکھڑی کا ناز، کہ اللہ کی پناہ​

صحنِ زمیں پہ شب کی سیاہی لیے ہوئے​

یہ آسمان، افسرِ شاہی لیے ہوئے​

​

کندن سے یہ کلس، یہ دل آویز کوہسار​

یہ دل کشا چمن، یہ فرح بخش لالہ زار​

شاخوں کا دلبری سے لچکنا یہ بار بار​

یہ مہر کا جمال، نہ پنہاں، نہ آشکار​

یہ آسمان، جلوہ گری پر تُلا ہوا​

یہ حسنِ لازوال کا پرچم کھلا ہوا​

​

اے شیخ! تو نہیں ہے حقائق سے بہرہ یاب​

فطرت پرست جوش پر اور اِس قدر عتاب​

فطرت بھی تیری طرح سے ہے صاحبِ کتاب​

اِس دین کا صحیفۂ زریں ہے آفتاب​

خاشاک کہہ رہا ہے جسے تو، وہ پھول ہے​

ناداں! صباحِ غنچہ کشا بھی رسول ہے!​

​

(جوش ملیح آبادی)​

۱۹۲۶ء​