پہنچے کہاں سے کوئی تیرے خد و خال تک - ریحان اعظمی

[حسان خان]

پہنچے کہاں سے کوئی تیرے خد و خال تک​

روشن نہ ہو سکے جہاں شمعِ خیال تک​

​

ہم وہ الم نصیب کہ خواہش کے باوجود​

خوشیاں تو کیا ملا نہیں حرفِ ملال تک​

​

اب طائرِ خیال قفس سے نکل پڑا​

باقی اڑان اور ہے اُس خوش جمال تک​

​

صحرائے آرزو میں کہاں تک سفر کریں​

لے آئے خود کو کھینچ کر حدِّ وصال تک​

​

کچھ لوگ یوں چراغِ انا سے جھلس گئے​

باقی رہی نہ جسمِ تکبر پہ کھال تک​

​

ہم وہ بلند قد ہیں کہ سولی گواہ ہے​

بامِ عروج پر ہی رہے ارتحال تک​

​

ریحان کیسے صید کرو گے غزل کو تم​

جب تک نہ حرف آئیں گے دامِ خیال تک​

​

(ریحان اعظمی)​

 

[علی فاروقی]

ہم وہ الم نصیب کہ خواہش کے باوجود
خوشیاں تو کیا ملا نہیں حرفِ ملال تک

بہت خوب، شئیر کرنے کاشکریہ​

 

[سید زبیر]

بہت خوب
ہم وہ الم نصیب کہ خواہش کے باوجود
خوشیاں تو کیا ملا نہیں حرفِ ملال تک
واہ ۔ ۔ ۔ کیا بات ہے