حسان خان
لائبریرین
(نذرِ جوش)
وہ صبحِ گل، وہ جوشِ شامِ بادہ ہے کہاں ساقی
نہ جشنِ دل، نہ فصلِ روئے سادہ ہے یہاں ساقی
حیاتِ نو گریباں چاک، پیراہن دریدہ ہے
سحر کی روشنی پہ خونِ دل کا ہے گماں ساقی
مذاقِ عاشقی اک جرم ہے ان کی سیاست میں
متاعِ دلبری ہے تیغ و شمشیر و سناں ساقی
تماشا بن گئی انساں کی خواری اس زمانے میں
جہاں سے اٹھ گیا رسمِ مروت کا نشاں ساقی
خبر ہے زخم کا ہے نام تمغائے وفاداری
سنا ہے تیغ ہے پیغمبرِ امن و اماں ساقی
یہ محفل ہے کہ مقتل گاہ ہے اہلِ تمنا کی
یہاں تو بات کرنے پر بھی کٹتی ہے زباں ساقی
اب ان کے ہاتھ میں ہے اہتمامِ بزمِ انسانی
جو کانٹوں کو اڑھاتے ہیں حریر و پرنیاں ساقی
جہاں فریاد سے اہلِ ستم کا جی بہلتا ہے
وہاں پر کون سمجھے گا زبانِ بے زباں ساقی
ہوئی ہے تربیت دل کی جلالِ خاکساری سے
مری نظروں میں کیا ٹھہرے شکوہِ خسرواں ساقی
کوئی دیوانہ کوئی رند کیوں بڑھتا نہیں آگے
کہ خالی دیر سے ہے مسندِ پیرِ مغاں ساقی
یہ مانا گر زباں کھولی تو جاں سے ہاتھ دھونا ہے
یہ خاموشی تو لیکن روح و دل کا ہے زیاں ساقی
کہیں سے ڈھونڈ لے انداز اگلی بے قراری کا
کہیں سے لے کے آ پہلا سا وہ قلبِ تپاں ساقی
(علی سردار جعفری)
۱۹۷۴ء