جوش وہ جوشِ خیرگی ہے، تماشا کہیں جسے

[حسان خان]

وہ جوشِ خیرگی ہے، تماشا کہیں جسے​

بے پردہ یوں ہوئے ہو کہ پردا کہیں جسے​

​

اللہ ری خاکسارئ رندانِ بادہ خوار​

رشکِ غرورِ قیصر و کسریٰ کہیں جسے​

​

بجلی گری وہ دل پہ جگر تک اتر گئی​

اُس چرخِ ناز سے، قدِ بالا کہیں جسے​

​

زلفِ حیاتِ نوعِ بشر میں ہے آج تک​

وہ خَم، گناہِ آدم و حوّا کہیں جسے​

​

کتنی حقیقتوں سے فزوں تر ہے وہ فریب​

دل کی زباں میں وعدۂ فردا کہیں جسے​

​

میرا نفَس ہے، جس کا لقب ہے شمیمِ زلف​

میری نظر ہے چہرۂ زیبا کہیں جسے​

​

وہ بھی ہے ایک اصل میں بہکی ہوئی وفا​

اہلِ جہاں عداوتِ اعدا کہیں جسے​

​

لو، آ رہا ہے وہ کوئی مستِ خرامِ ناز​

اِس چال سے کہ لرزشِ صہبا کہیں جسے​

​

میرے نشاط خانۂ امروز میں نہیں​

وہ بزدلی کہ خطرۂ فردا کہیں جسے​

​

جنجر ہے جوش ہات میں، دامن لہو سے تر​

یہ اُس کے طَور ہیں کہ مسیحا کہیں جسے​

​

(جوش ملیح آبادی)​

۱۹۲۸ء​