حبیب جالب وطن سے الفت ہے جرم اپنا یہ جرم تا زندگی کریں گے

[مہ جبین]

وطن سے الفت ہے جرم اپنا یہ جرم تا زندگی کریں گے​

ہے کس کی گردن پہ خونِ ناحق یہ فیصلہ لوگ ہی کریں گے​

​

وطن پرستوں کو کہہ رہے ہو وطن کا دشمن ڈرو خدا سے​

جو آج ہم سے خطا ہوئی ہے ، یہی خطا کل سبھی کریں گے​

​

وظیفہ خواروں سے کیا شکایت ہزار دیں شاہ کو دعائیں ​

مدار جن کا ہے نوکری پر وہ لوگ تو نوکری کریں گے ​

​

لئے جو پھرتے ہیں تمغہء فن ، رہے ہیں جو ہم خیالِ رہزن​

ہماری آزادیوں کے دشمن ہماری کیا رہبری کریں گے​

​

نہ خوفِ زنداں نہ دار کا غم یہ بات دہرارہے ہیں پھر ہم​

کہ آخری فیصلہ وہ ہوگا جو دس کروڑ آدمی کریں گے​

​

ستم گروں کے ستم کے آگے نہ سر جھکا ہے نہ جھک سکے گا​

شعارِ صادق پہ ہم ہیں نازاں جو کہہ رہے ہیں وہی کریں گے​

​

یہ لوگ کچھ کم نگاہ جن کو سمجھ رہے ہیں کہ ناسمجھ ہیں ​

یہی زمانے میں عام جالب شعور کی روشنی کریں گے​

​

​

حبیب جالب​

​

​