یوسف سلطان
محفلین
مصطفی جان رحمت پہ لاکھوں سلام
صاحب تاجِ عزت پہ لاکھوں سلام
واقفِ راز فطرت پہ لاکھوں سلام
قاسمِ کنزِ نعمت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس کو بے چین رکھتا تھا اُمت کا غم
نیک و بد پر رہا جس کا یکساں کرم
وہ حبیبِ خُدا ، وہ شفیعِ اُمم
شہریارِارم ، تاجدارِ حرم
نو بہارِ شفاعت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
سرورِ دوجہاں،شاہِ جن و بشر
جس کی چوکھٹ پہ جھُکتے ہیں شاہوں کے سَر
عبدِ خالق مگر خلق کا تاجور
صاحبِ رَجعت وشمس شق القمر
نائبِ دستِ قدرت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
وہ خُداوندِ اقلیمِ جُود وسخا
ہادیِ انس و جاں صاحبِ ہر دوسرا
سربر و آوردہ حلقہِ انبیاء
جس کے زیرِ لوا آدم و من سوا
اُس سزائے سیادت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
عہدِ طفلی میں وہ دلبرانہ چلن
دلستاں خامشی ، معجزانہ سُخن
حُسن میں دلکشی ، چال میں بانکپن
اللہ اللہ وہ بچپنے کی پھبن
اُس خُدا بھاتی صورت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
سُرمگیں آنکھ مازاغ کی رازداں
حلقہِ زُلف امت کا دارالاماں
ہاتھ فیاض ، عقدہ کشا انگلیاں
پتلی پتلی گُلِ قدس کی پتیاں
اُن لبوں کی نزاکت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
نور افشاں ہوا جب وہ بطحا کا چاند
دیکھنے آئے سب ، روئے زیبا کا چاند
آسماں پر پڑا ماند دُنیا کا چاند
جس سُہانی گھڑی چمکا طیبہ کا چاند
اس دل افروز ساعت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس گھڑی یاد بابِ حرم آ گیا
سوزِ فرقت سے آنکھوں میں نم آ گیا
موج میں جب وہ عیسٰی حشم آ گیا
جس طرف اُٹھ گئی دم میں دم آ گیا
اُس نگاہِ عنایت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
رنجِ تنہائی تنہا سے پوچھے کوئی
دردِ شبیر، زہرا سے پوچھے کوئی
تہہ میں کیا ہے یہ دریا سے پوچھے کوئی
کس کو دیکھا یہ موسٰی سے پوچھے کوئی
آنکھ والوں کی ہمت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس کی تقدیس کا رنگ گہرا رہا
جس کے در پر فرشتوں کا پہرا رہا
مغفرت کی سند ، جس کا چہرا رہا
جس کے ماتھے شفاعت کا سہرا رہا
اس جبینِ سعادت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
بندگی جس کے صدقے ٹھکانے لگے
جس کے دیکھے خُدا یاد آنے لگے
جس سے روتے ہوئے مسکرانے لگے
جس سے تاریک دل جگمگانے لگے
اُس چمک والی رنگت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
روئے روشن پہ پڑتی نظر کی قسم
آمنہ کے چمکتے قمر کی قسم
مجھ کو سرکار کے سنگِ در کی قسم
کھائی قرآن نے خاکِ گزر کی قسم
اُس کفِ پا کی حُرمت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس کا حامی خداوندِ عالم رہا
فتح کا جس کے ہاتھوں میں پرچم رہا
جس کا رتبہ جہاں میں مسلم رہا
جس کے آگے سرِ سروراں خَم رہا
اُس سرِ تاجِ رفعت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس کے آگے سلاطینِ عالم جُھکے
جس کے اک بول پر اہلِ دل مَر مٹیں
جس کی تعمیلِ ارشاد قدسی کریں
وہ زباں جس کو سب کُن کی کنجی کہیں
اُس کی نافذ حکومت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
وقتِ دیدار، چشمِ تماشا جھُکی
دیکھ کر جلوہ گر،موجِ دریا جھُکی
جس کی آمد پہ دیوارِ کِسریٰ جھُکی
جس کے سجدے کو محرابِ کعبہ جھُکی
اُن بھوؤں کی لطافت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
خیرِ دُنیا نہیں ، خیرِعُقبٰی نہیں
اُس کے دستِ تصرف میں کیا کیا نہیں
جس کی طاقت کا کوئی ٹھکانہ نہیں
جس کو بارِ دو عالم کی پرواہ نہیں
ایسے بازو کی قوت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
کون ہے وہ ، کرم جس پہ ان کا نہیں
سب کے ہیں،صرف میرے ہی آقا نہیں
ایک میں ہی غلام ان کا تنہا نہیں
ایک میرا ہی رحمت کا دعویٰ نہیں
شاہ کی ساری امت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
خواجہ تاشِ نصیر ثنا خواں ، رضا
وہ بریلی کے احمد رضا خاں رضا
لا کے صف میں مجھے انکے درباں ، رضا
مجھ سے خدمت کے قدسی کہیں ہاں رضا
مصطفٰی جانِ رحمت پہ لاکھوں سلام
مصطفٰی جانِ رحمت پہ لاکھوں سلام
شمعِ بزمِ ہدایت پہ لاکھوں سلام
صلی اللہ علیہ والہ وسلم
تضمین بر کلامِ امام احمد رضا خان بریلوی رحمتہ اللہ علیہ
از
پیر سید غلام نصیر الدین نصیر گیلانی رحمتہ اللہ علیہ