ناسخ مردوں کو جِلاتی ہے تری ناز کی آواز - امام بخش ناسخ

[حسان خان]

مردوں کو جِلاتی ہے تری ناز کی آواز​

اعجاز کا اعجاز ہے آواز کی آواز​

​

کیا ہجر میں خوش آئے مجھے ساز کی آواز​

یاد آتی ہے ہر دم کسی دمساز کی آواز​

​

سنتا نہیں نالے تُو مرے طائرِ دل کے​

ایسی نہیں مرغانِ خوش آواز کی آواز​

​

چلاتے پھریں کیوں نہ کہ یاد آ گئی ہم کو​

وہ ناز کی رفتار وہ انداز کی آواز​

​

ہے گلشنِ قرطاس میں گلبانگِ عنادل​

میرے قلمِ قافیہ پرداز کی آواز​

​

طوطی کی ہے منقار ترے ہونٹ سے گو سرخ​

پر لائے کہاں سے وہ ترے ناز کی آواز​

​

اک تیر میں مثلِ لبِ سوفار ہوا چپ​

نکلی نہ ترے عاشقِ جانباز کی آواز​

​

گانے جو لگے میری غزل بزمِ غنا میں​

پردے میں چھپی شرم سے ہر ساز کی آواز​

​

اڑ طائرِ جاں وصل کی شب تا نہ سنوں میں​

مرغِ سحرِ تفرقہ پرداز کی آواز​

​

طنبور کے تار آب ہوئے تُو جو الاپا​

داؤد کے مانند ہے اعجاز کی آواز​

​

لاتا ہے کہاں نامۂ محبوب کبوتر​

اے طائرِ جاں ہے تری پرواز کی آواز​

​

تالو سے لگا لیتے ہیں ہم اپنی زباں کو​

سنتے ہیں اگر دور سے غماز کی آواز​

​

گانا نہ کسی کا اُسے تا زیست خوش آیا​

جس نے کہ سنی اُس بتِ طناز کی آواز​

​

ناسخ کی غزل سن کے کہا کرتے ہیں شاباش​

آتی ہے مجھے حافظِ شیراز کی آواز​

​

(امام بخش ناسخ)​

 

[مہدی نقوی حجاز]

واہ۔ زبر دست!
بہت شکریہ حسان یہ اشتراک پہ رکھنے کا!

 

[حسان خان]

واہ۔ زبر دست!
بہت شکریہ حسان یہ اشتراک پہ رکھنے کا!

سپاس عرض کرتا ہوں جنابِ حجاز۔

 

[غدیر زھرا]

کیا ہجر میں خوش آئے مجھے ساز کی آواز​

یاد آتی ہے ہر دم کسی دمساز کی آواز​

سنتا نہیں نالے تُو مرے طائرِ دل کے​

ایسی نہیں مرغانِ خوش آواز کی آواز

عمدہ ​

 

[طارق شاہ]

مردوں کو جلاتی ہے تری ناز کی آواز​

اعجاز کا اعجاز ہے آواز کی آواز​

پہلے مصرع کی جیم کو دئے کسرہ ہٹانے سے شعر دلچسپ ذومعنویت اور ایہام کاحامل ہو جاتا ہے ​

​

تشکّر شیئر کرنے پر​

بہت خوش رہیں
​