جوش لیلائے آزادی سے - جوش ملیح آبادی

[حسان خان]

گوش بر آواز ہیں نوواردانِ انجمن!​

زحمتِ یک حرفِ تازہ اے بُتِ شیریں سخن​

​

زندگی کو صبح دے اے مشعلِ یزداں نما​

ایک مدت سے ہے شب افشاں زمیں پر اہرمن​

​

کاکل و مژگاں کو برہم کر کے دنیا کو بتا​

یہ کہ یہ ہستی ہے پیہم دعوتِ دار و رسن​

​

جس سے شاخیں جھومنے لگتی ہیں، کھِل جاتے ہیں پھول​

پھر وہی موجِ سخن اے چشمۂ طرفِ چمن​

​

زیست کی آہ و فغاں سے پھر ہے کانوں میں خراش​

مسکرا کر پھر اٹھا لے بربط اے گل پیرہن​

​

ناز سے اٹھلا رہے ہیں ہر روش پر زشت رُو​

کس طرف ہے اے بُتِ بستاں جبین و سیم و تن​

​

باغ پر چھائے ہوئے ہیں خادمانِ خار و خس​

اب تو در آ باغ میں اے خسروِ سروِ چمن​

​

اِس طرف بھی اک نظر اے میرِ بزمِ صبح گاہ​

مدتوں سے تیرگیِ شب ہے صدرِ انجمن​

​

ہو چکا دورِ صبوحی، ساقیِ رنگیں مزاج​

ہات میں تلوار دے کر، دوش پر رکھ دے کفن​

​

اذنِ تبلیغِ محبت دے نگاہِ ناز کو​

گامزن ہیں جادۂ نفرت پہ شیخ و برہمن​

​

زندگی و سربلندی کا دلوں کو درس دے​

اے بہ لب آبِ حیات و اے بہ قد سروِ چمن​

​

ترک فرما یہ خموشی، چاک کر دے یہ نقاب​

اے لبِ ساقی شکار و اے رخِ مینا شکن​

​

دستخط کر دے جدید آئین کے فرمان پر​

یہ ہے قرطاس و قلم، اے ناسخِ شرعِ کہن​

​

ٹوٹ جائے سبحۂ و زنّار کا بندِ گراں​

کھول دے ہاں دوش پر زلفِ شکن اندر شکن​

​

قدر فرما جوش کی لیلائے آزادیِ ہند​

یہ گدائے راہ ہے سلطانِ اقلیمِ سخن​

​

(جوش ملیح آبادی)​

نومبر ۱۹۴۵ء​