فیض فلسطینی شہداء جو پردیس میں کام آئے

[حسان خان]

میں جہاں بھی گیا ارضِ وطن​

تیری تذلیل کے داغوں کی جلن دل میں لئے​

تری حرمت کے چراغوں کی لگن دل میں لئے​

تیری الفت، تری یادوں کی کسک ساتھ گئی​

تیرے نارنج شگوفوں کی مہک ساتھ گئی​

سارے اَن دیکھے رفیقوں کی جِلو ساتھ رہا​

کتنے ہاتھوں سے ہم آغوش مرا ہاتھ رہا​

دور پردیس کی بے مہر گذر گاہوں میں​

اجنبی شہر کی بے نام و نشاں راہوں میں​

جس زمیں پر بھی کھُلا میرے لہو کا پرچم​

لہلہاتا ہے وہاں ارضِ فلسطیں کا عَلَم​

تیرے اعدا نے کیا ایک فلسطیں برباد​

میرے زخموں نے کئے کتنے فلسطیں آباد​

​

(فیض احمد فیض)​

بیروت ۸۰ ء​

 

[طارق شاہ]

فیض صاحب کی، کیا بات ہو جناب
بہت خوب انتخاب
تشکّر شیئر کرنے پر ، بہت شادماں رہیں

 

[سید زبیر]

حسان خان ! بہت اعلیٰ انتخاب
تیرے اعدا نے کیا ایک فلسطیں برباد
میرے زخموں نے کئے کتنے فلسطیں آباد