جوش غلاموں سے خطاب - حضرت جوش ملیح آبادی

[حسان خان]

اے ہند کے ذلیل غلامانِ روسیاہ!​

شاعر سے تو ملاؤ خدا کے لیے نگاہ​

​

اِس خوفناک رات کی آخر سحر بھی ہے؟​

توپیں گرج رہی ہیں سروں پر خبر بھی ہےِ؟​

​

اے امتِ شکستہ دل و اے گروہِ شل!​

کب سے بلا رہا ہوں میں تجھ کو سوئے عمل!​

​

تجھ پر مرے کلام کا ہوتا نہیں اثر​

چونکا رہا ہوں کب سے میں شانے جھنجھوڑ کر​

​

حالانکہ میرا شعر ہے وہ حرفِ تند و تیز​

طوفاں بدوش و صاعقہ پیما و حشر خیز​

​

ضد پر جو آئے، بات میں پتھر کو توڑ دے​

صرف اک صدا سے گنبدِ بے در کو توڑ دے​

​

چاہے تو زمہریر سے اُڑنے لگیں شرار​

گلبرگِ تر کے بطن سے پیدا ہو ذوالفقار​

​

اُکسائے میرا شعر اگر جذبہ ہائے جنگ​

پیدا ہو آبگینے کے اندر مزاجِ سنگ​

​

خرمن میں میرا شعر اگر کج کرے کلاہ​

خس تند بجلیوں سے لڑانے لگے نگاہ​

​

آہن کے جوہروں سے ٹپکنے لگے شراب​

پیری کی ہڈیوں میں مچلنے لگے شباب​

​

تجھ کو یقیں نہ آئے گا اے دائمی غلام!​

میں جا کے مقبروں میں سناؤں اگر کلام​

​

خود موت سے حیات کے چشمے ابل پڑیں​

قبروں سے سر کو پیٹ کے مردے نکل پڑیں​

​

میرے رجز سے لرزہ بر اندام ہے زمیں​

افسوس تیرے کان پہ جوں رینگتی نہیں​

​

تُو چپ رہا، زمین ہلی، آسماں ہلا​

تجھ سے تو کیاَ، خدا سے کروں گا میں یہ گلا​

​

اِن بزدلوں کے حُسن پہ شیدا کیا ہے کیوں؟​

نامرد قوم میں مجھے پیدا کیا ہے کیوں؟​

​

(جوش ملیح آبادی)​

۱۹۳۳ء​