جوش علی گڑھ کالج کی پنجاہ سالہ جوبلی - جوش ملیح آبادی

[حسان خان]

یہ نہ پوچھو کہ ہم نے کیا دیکھا​

جوبلی میں وہ ماجرا دیکھا​

​

قوم سے جس نے کر دیا بیزار​

بن گئے ہم تو نقش بر دیوار​

​

اتنے بہروپئے نظر آئے​

اپنی آنکھوں میں اشک بھر آئے​

​

پوششیں مغربی اماموں کی​

صورتیں مشرقی غلاموں کی​

​

پینٹ میں ہاتھ اور منہ میں سگار​

شانے ہلتے ہوئے دمِ گفتار​

​

طاقِ دل میں چراغِ انگریزی​

سر کے اندر دماغِ انگریزی​

​

چال انگریزی ڈھال انگریزی​

جسم کا بال بال انگریزی​

​

جسمِ ہندی میں جان انگریزی​

منہ کے اندر زبان انگریزی​

​

گفتگو میں بنی ہوئی آواز​

خمِ گردن میں مغربی انداز​

​

اپنے لہجوں سے ہاتا پائی تھی​

حلق کی ساخت سے لڑائی تھی​

​

چھِل رہا ہے گلا تو چھِل جائے​

لہجہ 'صاحب' سے اپنا مل جائے​

​

جوش! پنجاہ سالہ جوبلی کا​

آپ سمجھے کہ مدعا کیا تھا؟​

​

یہ جتانا تھا، دیکھو بڑھ گئے ہم​

سوئے نصرانیت پچاس قدم!​

​

آنچ گم، ہر طرف دھواں ہی دھواں​

وائے بر سعیِ سید احمد خاں​

​

(جوش ملیح آبادی)​