جوش علی گڑھ سے خطاب - جوش ملیح آبادی

[حسان خان]

اے علی گڑھ، اے جواں قسمت دبستانِ کہن​

اے کہ شمعِ فکر سے تابندہ تیری انجمن​

تیرے پیمانوں میں لرزاں ہے شرابِ علم و فن​

حشر کے دن تک پھلا پھولا رہے تیرا چمن​

مشعلِ مینا سے روشن تیرا میخانہ رہے​

رہتی دنیا تک ترا گردش میں پیمانہ رہے​

​

ایک دن ہم بھی تری آنکھوں کے بیماروں میں تھے​

تیری جنسِ علم پرور کے خریداروں میں تھے​

تیری زلفِ خم بہ خم کے نوگرفتاروں میں تھے​

تیرے اصنامِ سمن بر کے پرستاروں میں تھے​

تیری برقِ جلوۂ رنگیں پہ شیدا ہم بھی تھے​

تیرے کوہِ طور کے اک روز موسیٰ ہم بھی تھے​

​

لیکن اے علم و معارف کے درخشاں آفتاب​

کچھ بہ اندازِ دگر بھی تجھ سے کرنا ہے خطاب​

گو یہ دھڑکا ہے کہ ہوں گا موردِ قہر و عتاب​

کہہ بھی دوں جو کچھ ہے دل میں، تا کجا یہ پیچ و تاب​

بن پڑے جو سعی اپنے سے وہ کرنا چاہیے​

مرد کو کہنے کے موقع پر نہ ڈرنا چاہیے​

​

اے علی گڑھ! اے ہلاکِ جلوۂ وضعِ فرنگ​

"ٹیمز" ہے آغوش میں تیرے، بجائے موجِ گنگ​

ظلمتِ مغرب میں ہے آوارہ تیری ہر امنگ​

ولولوں پر تیرے شاید عرصۂ مشرق ہے تنگ​

آ کہ حیراں ہے وطن کا کارواں تیرے لیے​

گوش بر آواز ہے ہندوستاں تیرے لیے​

​

عاشقِ مغرب! نگاہِ شرق کے جادو بھی دیکھ​

اے سنہری زلف کے قیدی، سیہ گیسو بھی دیکھ​

دیدۂ ازرق کے شیدا، دیدۂ آہو بھی دیکھ​

سازِ بے رنگی کے بندے! سوزِ رنگ و بو بھی دیکھ​

"جسم" تا کے؟ "روحِ" لرزاں کے شرارے کو بھی دیکھ​

"ٹیمز" سے منہ موڑ کر گنگا کے دھارے کو بھی دیکھ​

​

پختہ کاری سیکھ، یہ آئینِ خامی تا کجا​

جادۂ افرنگ پر یہ تند گامی تا کجا​

سوچ تو جی میں یہ جھوٹی نیک نامی تا کجا​

مغربی تہذیب کا طوقِ غلامی تا کجا​

مرد اگر ہے غیر کی تقلید کرنا چھوڑ دے​

چھوڑ دے، للہ! بالاقساط مرنا چھوڑ دے​

​

(جوش ملیح آبادی)​

۱۹۲۸ء​