علی سردار جعفری شاعر - علی سردار جعفری

[حسان خان]

لے کے آیا ہوں زمانے کے لیے پیغامِ گل​

میں ہوں خوشبوئے چمن، پیغمبرِ فصلِ بہار​

​

میں غلامی کے اندھیرے میں ہوں آزادی کا نور​

میں حق و باطل کی پیکاروں میں تیغِ آب دار​

​

کذب کی تاریک راتوں میں صداقت کا ظہور​

وقت کے سادہ افق پر رنگِ صبحِ زرنگار​

​

موت کی پُرہول وادی میں ہوں طوفانِ حیات​

غم کے سینے پر مسرت کا سنہرا آبشار​

​

یوں مری آغوش میں سمٹی ہوئی ہے زندگی​

جس طرح قوسِ قزح میں سات رنگوں کا نکھار​

​

میں انیسِ شامِ ہجراں، میں ندیمِ صبحِ وصل​

میں شریکِ بزمِ عشرت، میں رفیقِ کارزار​

​

ہم نشینِ لالہ و گل، ہم نوائے عندلیب​

ہم رکابِ رنگِ نکہت، ہم دمِ بادِ بہار​

​

میں ہوں صدیوں کا تفکر، میں ہوں قرنوں کا خیال​

میں ہوں ہم آغوش ازل سے، میں ابد سے ہم کنار​

​

میرے نغمے قیدِ ماہ و سال سے آزاد ہیں​

میرے ہاتھوں میں ہے لافانی تمنا کا ستار​

​

گاہ تبلیغِ محبت، گاہ کی تبلیغِ حسن​

بے حسوں کے دل کو بخشا سوزِ شامِ انتظار​

​

نقشِ مایوسی میں بھر دیتا ہوں امیدوں کا رنگ​

میں عطا کرتا ہوں شاخِ آرزو کو برگ و بار​

​

چن لیے ہیں باغِ انسانی سے ارمانوں کے پھول​

جو مہکتے ہی رہیں گے، میں نے گوندھے ہیں وہ ہار​

​

عارضی جلوؤں کو دی ہے تابشِ حسنِ دوام​

میری نظروں سے ہے روشن آدمی کی رہگذار​

​

(علی سردار جعفری)​