سُرُوربارہ بنکوی " اے جُنوں کچھ تو کھُلے آخر میں کِس منزل میں ہُوں "

[طارق شاہ]

غزل​

سُرُوربارہ بنکوی ​

​

اے جُنوں کچھ تو کھُلے آخر میں کِس منزل میں ہُوں​

ہُوں جوارِ یار میں، یا کوچۂ قاتل میں ہُوں ​

​

پابجولاں اپنے شانے پر لِئے، اپنی صلیب​

میں سفیرِحق ہوں لیکن نرغۂ باطل میں ہُوں​

​

جشن فردا کے تصوّر سے لہو گردِش میں ہے ​

حال میں ہوں، اور زندہ اپنے مستقبل میں ہُوں​

​

دم بَخُود ہُوں اب سرِ مقتل یہ منظر دیکھ کر!​

میں کہ خود مقتول ہوں لیکن صفِ قاتل میں ہُوں​

​

اک زمانہ ہوگیا بچھڑے ہوئے جس سے سُرُور ​

آج اُس کے سامنے ہوں اور بھری محفل میں ہُوں ​

​

سُرُوربارہ بنکوی​

 

[سید زبیر]

واہ ۔ طارق شاہ صاحب ۔ ۔ بہت اعلیٰ کلام پیش کیا ہے ۔
پابجولاں اپنے شانے پر لِئے، اپنی صلیب
میں سفیرِحق ہوں لیکن نرغہ باطل میں ہُوں

 

[طارق شاہ]

واہ ۔ طارق شاہ صاحب ۔ ۔ بہت اعلیٰ کلام پیش کیا ہے ۔
پابجولاں اپنے شانے پر لِئے، اپنی صلیب
میں سفیرِحق ہوں لیکن نرغہ باطل میں ہُوں

سید صاحب!
سُرُور صاحب کی غزل انتخاب کرنے پر آپکی داد و ستائش دلی خوشی کا باعث ہوا
اس اظہارِ خیال اور پذیرائی کے لئے دلی تشکّر !
بہت خوش رہیں