سوزشِ عشق سے بے تاب رہا کرتا ہوں - مولوی سید فضلِ رسول خان بہادر واسطی

[حسان خان]

سوزشِ عشق سے بے تاب رہا کرتا ہوں​

آدمی ہو کے میں سیماب رہا کرتا ہوں​

​

بے قراری ہے مری شدتِ گریہ میں وہی​

آب میں ماہیِ بے آب رہا کرتا ہوں​

​

ضعفِ پیری سے گریباں میں نہیں سر میرا​

صرفِ سجدہ تہِ محراب رہا کرتا ہوں​

​

تاج سے مجھ کو نہ مطلب ہے نہ کجکول سے کام​

تارکِ عالمِ اسباب رہا کرتا ہوں​

کجکول = کشکول​

​

ہے کسی کے رخِ پرنور کا اُس پر جو گماں​

محوِ نظارۂ مہتاب رہا کرتا ہوں​

​

گرد پھرتا ہوں کسی قلزمِ خوبی کے مدام​

دور میں صورتِ گرداب رہا کرتا ہوں​

​

ذبح ہو جانے کا یہ شوق ہے فرقت میں مجھے​

واردِ مسلخِ قصاب رہا کرتا ہوں​

مسلخ = مذبح، ذبح خانہ، جانوروں کی کھال اتارے جانے کی جگہ​

​

تیرے دانتوں کے مضامیں کی ہے ہر وقت تلاش​

طالبِ گوہرِ نایاب رہا کرتا ہوں​

​

ہے سفر میں خبرِ اہلِ وطن کا جو خیال​

خواستگارِ خطِ احباب رہا کرتا ہوں​

​

چاہتا ہوں کہ تری نرگسِ میگوں دیکھوں​

طالبِ جامِ مئے ناب رہا کرتا ہوں​

​

واسطی فاتحِ خیبر کا جو ہوں دل سے غلام​

فوجِ اعدا پہ ظفر یاب رہا کرتا ہوں​

​

(مولوی سید فضلِ رسول خان بہادر واسطی)​

 

[صائمہ شاہ]

واہ
آدمی ہو کے میں سیماب رہا کرتا ہوں