حسان خان
لائبریرین
لو آگیا وہ کوئی گلستاں لیے ہوئے
چہرے پہ رنگِ صبحِ درخشاں لیے ہوئے
کلیاں ہر اک روش پہ چٹکنے لگیں تمام
گوہر فشانئ لبِ خوباں لیے ہوئے
نکلا فضا پہ صبح کا وہ نقرئی جلوس
گلبانگِ طائرانِ خوش الحاں لیے ہوئے
فیضِ صبا سے مقدمِ صبحِ بہار میں
ہر خار و خس ہے جنبشِ مژگاں لیے ہوئے
یہ رنگ کیا ہے کشورِ ہندوستاں کا آج
ہر ذرۂ حقیر ہے بستاں لیے ہوئے
یعنی ہر ایک ذرہ ہے خونِ وفا سے سرخ
اور سرخیاں ہیں روضۂ رضواں لیے ہوئے
اِس موجِ خوں سے دل میں نہ لانا کبھی ہراس
یہ موجِ خوں ہے لعلِ بدخشاں لیے ہوئے
اس ترکِ اشتداد سے ہونا نہ بدحواس
یہ ترک ہے خروشِ فراواں لیے ہوئے
اِن عصمتوں سے اہلِ دغا کی نہ ہو اداس
یہ عصمتیں ہیں جذبۂ عصیاں لیے ہوئے
گو ہند آج باغِ جہاں میں ہے مثلِ خس
یہ خار و خس ہے سنبل و ریحاں لیے ہوئے
اِن جالیوں پہ محبسِ تاریک کی نہ جا
یہ جالیاں ہیں جنبشِ مژگاں لیے ہوئے
اِن کروٹوں کو اہلِ قفس کی سبک نہ جان
یہ کروٹیں ہیں موجۂ طوفاں لیے ہوئے
ان ظلمتوں پہ مطلعِ امید کی نہ جا
یہ ظلمتیں ہیں چشمۂ حیواں لیے ہوئے
ظاہر میں بزدلی ہے یہ درماندگی مگر
یہ بزدلی ہے جنگ کا ساماں لیے ہوئے
آگاہ ہو ندیم! کہ یہ زمہریرِ صبر
دل میں ہے عزمِ شعلۂ عریاں لیے ہوئے
آزادیوں کے دیکھ رہا ہے لطیف خواب
زندانیانِ عشق کو، زنداں لیے ہوئے
اے پیرِ خستہ! مژدہ، کہ سنکی ہوائے مصر
بوئے قمیصِ یوسفِ کنعاں لیے ہوئے
کہہ دو صدف سے آنکھ اٹھائے سوئے فلک
آیا ہے ابر قطرۂ نیساں لیے ہوئے
بلقیس سے کہو کہ سرِ بارگاہِ ناز
پریاں کھڑی ہیں تختِ سلیماں لیے ہوئے
جوش اہلِ دل کے پاؤں کی زنجیر پر نہ جا
یہ سلسلہ ہے زلفِ پریشاں لیے ہوئے
(جوش ملیح آبادی)
۱۹۲۴ء
