رہنے کو کیا برا ہے جو جنت میں گھر ملے - مرزا عزیز بیگ سہارنپوری (مخمس بر غزلِ غالب)

[حسان خان]

رہنے کو کیا برا ہے جو جنت میں گھر ملے​

پھر تو جناں جناں ہے وہاں تو اگر ملے​

آرام دل کو جلوۂ رخ دیکھ کر ملے​

تسکیں کو ہم نہ روئیں جو ذوقِ نظر ملے​

حورانِ خلد میں تری صورت مگر ملے​

​

اس طرح کر چھپا کے خبر دفن بعدِ قتل​

ظاہر نہ ہو ہوا ہے کدھر دفن بعدِ قتل​

قاتل اگر ہے مدِ نظر دفن بعدِ قتل​

اپنی گلی میں مجھ کو نہ کر دفن بعدِ قتل​

میرے پتے سے خلق کو کیوں تیرا گھر ملے​

​

بھولا ہے پیک بھی تو وفاداریِ قدیم​

ایسا گیا کہ جا کے وہیں ہو گیا مقیم​

ظالم کے انتظار میں ہے حالِ دل سقیم​

تجھ سے تو کچھ کلام نہیں لیکن اے ندیم​

میرا سلام کہیو اگر نامہ بر ملے​

​

مشہور ہے جہاں میں اثر جذبِ عشق کا​

صحرا میں کھنچ کے ناقۂ لیلیٰ چلا گیا​

اُس جذب کا ہمیں نہیں بے وجہ ادعا​

تم کو بھی ہم دکھائیں کہ مجنوں نے کیا کیا​

فرصت کشاکشِ غمِ پنہاں سے گر ملے​

​

طے کی ہیں اُن کے ساتھ بہت ہم نے منزلیں​

لیکن نہ پیشرو کبھی مانیں گے ہم اُنہیں​

اس رہ میں راہبر کی ضرورت نہیں ہمیں​

لازم نہیں کہ خضر کی ہم پیروی کریں​

مانا کہ اک بزرگ ہمیں ہم سفر ملے​

​

نامِ خدا تم آج ہو ساقیِ جامِ جم​

اغیار اور حریف ہیں اس بزم میں بہم​

دیتے ہو ہم کو مے تو نہ دینا کسی سے کم​

ساقی گری کی شرم کرو آج ورنہ ہم​

ہر شب پیا ہی کرتے ہیں مے جس قدر ملے​

​

مدت ہوئی ہمیں نہیں مرزاؔ کا کچھ پتا​

اِس آستاں کے خاک نشینوں میں وہ بھی تھا​

وہ بھی وہیں ملے گا جہاں ہو گا رہنما​

اے ساکنانِ کوچۂ دلدار دیکھنا​

تم کو کہیں جو غالبِؔ آشفتہ سر ملے​

​

(مرزا عزیز بیگ سہارنپوری)​