رنگ کیسا ہے یہ سیاست کا - ریحان اعظمی

[حسان خان]

رنگ کیسا ہے یہ سیاست کا!​

نشّہ ہر اک کو ہے حکومت کا​

​

روز ہوتا ہے انتخاب یہاں​

ایسا فقدان ہے قیادت کا​

​

جنگ ہے اقتدار کی جاری​

خون ہوتا ہے ملک و ملت کا​

​

شوق ہے 'لمبے مارچ' کا ان کو​

'چھوٹا رستہ' ہے یہ حکومت کا​

​

جھنڈے امن و اماں کے پست ہوئے​

سب سے اونچا علم ہے نفرت کا​

​

ہے کسی کو غرورِ کج کلہی​

زعم ہے کچھ کو اپنی دولت کا​

​

پِس رہے ہیں عوام چکی میں​

لمحہ لمحہ ہے اک قیامت کا​

​

جو حقیقت کی بات کرتے ہیں​

ان پہ الزام ہے بغاوت کا​

​

وہ گھروں میں خموش بیٹھے ہیں​

دھیان جن کو ہے اپنی عزت کا​

​

ہر مرض کا علاج ہے لیکن​

کوئی مرہم ہے زخمِ غربت کا؟​

​

اپنے ہی ملک میں پرایا ہوں​

شہر اک آئینہ ہے حیرت کا​

​

حرف کی سربلندیاں ریحان​

یہ بھی اک سلسلہ ہے قامت کا​

​

(ریحان اعظمی)​