دل جلوں سے دل جلوں کا رابطہ اچھا لگا - ریحان اعظمی

[حسان خان]

دل جلوں سے دل جلوں کا رابطہ اچھا لگا​

دو گھڑی مل بیٹھنے کا سلسلہ اچھا لگا​

​

کوئی خوبی تو نہ تھی مجھ میں کہ چاہا جاؤں میں​

پھر نجانے کیوں اسے چہرہ مرا اچھا لگا​

​

رات ساری جاگنے کے بعد مجھ کو صبحدم​

نیم باز آنکھوں سے اس کا دیکھنا اچھا لگا​

​

بات میری اور مخاطب اس کا ہونا غیر سے​

اس کا یہ طرزِ تکلم بھی بڑا اچھا لگا!​

​

سر مرے سینے پہ رکھ کے اس نے شرماتے ہوئے​

ساتھ جینے مرنے کا وعدہ کیا، اچھا لگا​

​

اپنے چہرے پر جو دیکھے اسکے ہونٹوں کے نقوش​

مدتوں کے بعد مجھ کو آئینہ اچھا لگا​

​

عمر بھر جاگے مگر ریحان اُس شب کی قسم​

ساتھ ان کو بھی جگا کر جاگنا اچھا لگا ​

​

(ریحان اعظمی)​

 

[سید زبیر]

بہت اعلیٰ
کوئی خوبی تو نہ تھی مجھ میں کہ چاہا جاؤں میں
پھر نجانے کیوں اسے چہرہ مرا اچھا لگا