حسان خان
لائبریرین
(ایرانی طلبہ کے نام)
خونِ ناحق سے ہوا رنگیں گلستانِ عجم
مشعلوں کی طرح روشن ہیں جوانانِ عجم
دل کی ٹھنڈک، روح کی گرمی، نگاہوں کا سرور
شعلہ و شبنم کے پیکر ہیں حسینانِ عجم
آندھیوں کا زمزمہ، بیتاب طوفانوں کا گیت
ہیں قیامت کے مغنی نغمہ سنجانِ عجم
نوجواں سینوں پہ زخموں کے سنہری آفتاب
آخرش ظاہر ہوئے افکارِ پنہانِ عجم
سعدی و فردوسی و حافظ کی آتی ہے صدا
خود عجم کے درد میں پنہاں ہے درمانِ عجم
جبر کر سکتا ہے کب تک عزم و ہمت کو اسیر
کھلکھلا کر ہنس پڑی دیوارِ زندانِ عجم
خرمنِ ظلم و ستم کا آخری لمحہ ہے یہ
بن چکی ہے برق زنجیرِ غلامانِ عجم
صاحبِ سرمایہ ہوں گے اب تہی دستانِ شرق
ہر شکستہ دل ہے اک لعلِ بدخشانِ عجم
سرد جن سینوں میں ہے احساسِ انسانی کی آگ
ہاں اُدھر بھی ایک شعلہ، شعلہ دستانِ عجم
مٹ رہا ہے فرقِ سلطان و گدا، میر و فقیر
نامۂ اعمال ہے اور محشرستانِ عجم
اے گلِ خونیں جگر چاکِ گریبانم نگر
چوں چراغِ لالہ سوزم در خیابانِ عجم
(علی سردار جعفری)
۵ نومبر ۱۹۷۸ء
