خورشید فریدآبادی - "اِس قد مایوُس فِطرت ہو گئی تیرے بغیر"

[طارق شاہ]

​

غزلِ​

خورشید فریدآبادی​

​

اِس قدر مایوُس فِطرت ہو گئی تیرے بغیر ​

رنْج سے بدلی ہُوئی ہے ہرخوشی تیرے بغیر ​

​

بادۂ رنگیں کی لذّت، زہْرتھی تیرے بغیر ​

تیری آنکھوں کی قسم، ہم نے نہ پی تیرے بغیر​

​

صُبحِ گُلشن، ہے شبِ افسُردگی تیرے بغیر ​

لوٹ جاتی ہے، بہار آئی ہوئی تیرے بغیر ​

​

اب، مِری محرومیوں پر فصلِ گُل ہے طعنہ زن​

مُسکرا کر چھیڑتی ہے، ہر کلی تیرے بغیر ​

​

کائناتِ حُسن پر تاریکیاں چھانے لگیں​

ہو رہا ہے گُل، چراغِ عاشقی تیرے بغیر ​

​

تجھ سے چھُٹ کر، کتنا پھیکا پڑگیا ہے رنگِ گُل ​

ہوگئیں بیلے کی کلّیاں، سانْولی تیرے بغیر​

​

کل، جہاں پر ذرّہ ذرّہ طُور در آغوش تھا !​

آج، اُس گھر میں نہیں ہے روشنی تیرے بغیر​

​

دل نہیں جھُکتا ہے پہلے کی طرح، سجدوں کے ساتھ​

نا مُکمّل ہے مذاقِ بندگی تیرے بغیر​

​

آفتابِ روزِ محشر بن گیا فرقت میں چاند​

ہو گئی نارِ جہنّم، چاندنی تیرے بغیر​

​

ہر اُجالے پر انْدھیرے کا گُماں ہونے لگا​

شامِ غم ہے میری صُبحِ زندگی تیرے بغیر​

​

ہو گیا طاری خیالوں پر جہنّم ہوش کا ​

چِھن گئی ہے مجھ سے خلدِ بیخودی تیرے بغیر​

​

اے مِری اُمّید کے چاند! اِتنا بتلادے مجھے!​

میرے گھر میں کیوں نہ نکلی، چاندنی تیرے بغیر​

​

ہر تمّنا کو، شبِ فُرقت کچل کر رکھ دیا​

ہم کو اپنے دل سے ضِد سی ہوگئی تیرے بغیر​

​

نزْع کے عالم میں گُذرا ہے مِرا دَورِ فِراق​

موت کے دامن میں کھیلی زندگی تیرے بغیر​

​

ظاہراََ دنیا جسے محسُوس کرسکتی نہیں ​

ہوگئی ہے مجھ میں اِک ایسی کمی تیرے بغیر​

​

خُونِ دل ٹپکا کِیا، خورشید کے ہر لفظ سے​

ہوگیا رنگیں مذاقِ شاعری، تیرے بغیر​

​

خورشید فریدآبادی ​

​