حرفِ افسوس زباں تک کبھی آنے نہ دیا - ریحان اعظمی

[حسان خان]

حرفِ افسوس زباں تک کبھی آنے نہ دیا​

دامنِ صبر تجھے ہاتھ سے جانے نہ دیا​

​

خواب منت کشِ تعبیر کہاں سے ہوتا​

چشمِ بے خواب تلک نیند کو آنے نہ دیا​

​

مجھ کو تسلیم کہ پندارِ انا نے میرے​

کسی روٹھے ہوئے انساں کو منانے نہ دیا​

​

زخمِ دل نے بڑا ماحول بنائے رکھا​

درد کو اٹھ کے مرے پاس سے جانے نہ دیا​

​

ہجر میں قرض تھے کچھ اشک مری آنکھوں پر​

میرے احباب نے وہ قرض چکانے نہ دیا​

​

لاکھ مفلس سہی اک دیپ جلا سکتا تھا​

پر ہوا نے مجھے اک دیپ جلانے نہ دیا​

​

شکریہ اے غمِ جاناں کہ مرے ہونٹوں کو​

دو گھڑی بارِ تبسم بھی اٹھانے نہ دیا​

​

خود تو وہ بچھڑا مگر چھوڑ گیا ہے یادیں​

جشنِ تنہائی بھی جی بھر کے منانے نہ دیا​

​

غمِ جاناں، غمِ ہجراں تو کبھی فکرِ معاش​

چین ریحان کو تُو نے بھی زمانے نہ دیا​

​

(ریحان اعظمی)​