ولی دکنی جیوں گل شگفتہ رو ہیں سخن کے چمن میں ہم

[حسان خان]

جیوں گل شگفتہ رو ہیں سخن کے چمن میں ہم​

جیوں شمع سربلند ہیں ہر انجمن میں ہم​

​

ہم پاس آ کے بات نظیریؔ کی مت کہو​

رکھتے نہیں نظیر اپس کی سخن میں ہم​

​

ہیں داستانِ عشق ہمیں یاد کئی ہزار​

استاد بلبلاں کے ہیں ہر یک چمن میں ہم​

​

خوباں جگت کے جیو سوں ملتے ہیں ہم ستی​

کامل ہوئے ہیں بسکہ محبت کے فن میں ہم​

​

اُس شوخِ شعلہ رنگ کی جب سوں لگن لگی​

جلتے ہیں تب سوں شعلہ نمط اس لگن میں ہم​

​

یک بار ہنس کے بول صنم نئیں تو حشر لگ​

جیوں برق بے قرار رہیں گے کفن میں ہم​

​

ہرچند جگ کے بخت سیاہوں میں ہیں ولے​

کاجل ہو، جا بسے ہیں سجن کے نین میں ہم​

​

فرہاد تب سوں تیشہ نمن سر کیا تلے​

باندھے ہیں جب سوں جیو کوں شیریں بچن میں ہم​

​

دو جگ ہوئے ہیں دل سوں فراموش اے ولی​

رکھتے ہیں جب سوں یاد سری جن کی من میں ہم​

​

(ولی دکنی)​

​

جیوں = مانند​

جیو = دل​

ستی = سے​

نمط = طریقہ، روش، طرح، ڈھنگ​

لگ = تلک، تک​

نمن = طرح، مثل​

بچن = بات، قول​

سری جن = سجن، معشوق​

 

[سید زبیر]

حسان خان ، جیتے رہیں ،خوش رہیں
ہرچند جگ کے بخت سیاہوں میں ہیں ولے
کاجل ہو، جا بسے ہیں سجن کے نین میں ہم

 

[محمد وارث]

لاجواب، شکریہ جناب ارسال فرمانے کیلیے