جہاں میں حوصلۂ عزّ و نام پیدا کر - ولی الرحمٰن ولی کاکوی

[حسان خان]

جہاں میں حوصلۂ عزّ و نام پیدا کر​

پسِ فنا بھی بقائے دوام پیدا کر​

​

جگر میں لذتِ سوزِ دوام پیدا کر​

"دیارِ عشق میں اپنا مقام پیدا کر"​

​

برس پڑیں گی نگاہیں چہار جانب سے​

فروغِ جلوۂ ماہِ تمام پیدا کر​

​

نویدِ شوق تری رائگاں نہ جائے گی​

مگر سلیقۂ عرضِ پیام پیدا کر​

​

سکونِ ساحلِ دریا نہ ڈھونڈھ دریا میں​

مثالِ موجِ جہندہ خرام پیدا کر​

​

ہر ایک فرد ہو ملت کا نازشِ دوراں​

نظامِ دہر میں ایسا نظام پیدا کر​

​

نہ ہو فریفتۂ ساغر و خُمِ مغرب​

وطن کی خاک سے مینا و جام پیدا کر​

​

خودی کی قوتِ پنہاں سے کام لے ہمہ دم​

دلوں میں غیر کے بھی احترام پیدا کر​

​

پسند ہے تجھے کیوں پستیِ زمیں آخر​

فلک سے بھی کہیں اعلیٰ مقام پیدا کر​

​

نظر نہ آئیں گے یوں جلوہ ہائے رنگارنگ​

جدید ذوقِ طلب صبح و شام پیدا کر​

​

ہے موت قطرۂ احقر کی دورئ دریا​

برنگِ موج وصالِ دوام پیدا کر​

​

ولی بدل دے عروسِ غزل کا رنگِ کہن​

مثالِ حضرتِ اقبال نام پیدا کر​

​

(ولی الرحمٰن ولی کاکوی)​

 

[ام نور العين]

واہ بہت خوب !