جوش جامن والیاں

[حسان خان]

روحِ شاعر آج پھر ہے وجد میں آئی ہوئی​

آم کے باغوں پہ ہے کالی گھٹا چھائی ہوئی​

​

مست بھونرا گونجتا پھرتا ہے کوہ و دشت میں​

روح پھرتی ہے کسی وحشی کی گھبرائی ہوئی​

​

غنچہ غنچہ اپنے فطری رنگ میں ڈوبا ہوا​

پتی پتی، اپنے اصلی رنگ پر آئی ہوئی​

​

خارِ صحرا، فیضِ ابر و باد سے نکھرے ہوئے​

خاکِ گلشن، موجِ رنگ و بو سے اترائی ہوئی​

​

بہہ رہی ہیں ندیاں، ساون کے نغموں کی طرح​

گا رہی ہیں کوئلیں، موسم کی تڑپائی ہوئی​

​

آ رہی ہیں ناز سے نوخیز جامن والیاں​

انکھڑیوں میں اجنبیت، چال اٹھلائی ہوئی​

​

عمر کے نشے سے کچھ کچھ نیند میں ڈوبی ہوئی​

برق کی ہلچل سے کچھ کچھ ہوش میں آئی ہوئی​

​

ابر میں لچکے ہوئے پودوں کا دست و پا میں لوچ​

دھوپ کے تپتے ہوئے کھیتوں کی سنولائی ہوئی​

​

پھر رہی ہیں تربتر گلیوں میں سوتی جاگتی​

منہ اندھیرے ہی سے بوچھاروں کی چونکائی ہوئی​

​

دونوں ہاتوں سے سنبھالے ہیں سروں کے ٹوکرے​

ہات انگڑائی کی صورت، آنکھ شرمائی ہوئی​

​

ہائے یہ بکھری ہوئی زلفیں، یہ کالی جامنیں​

ہائے یہ گلشن، یہ ساون کی گھٹا چھائی ہوئی​

​

پائے نازک، راہ کے پانی سے یہ بھیگے ہوئے​

پنڈلیاں، زورِ جوانی سے یہ بل کھائی ہوئی​

​

ہائے یہ بھچتی ہوئی نوعمر جامن والیاں​

عاقبت اندیش دہقانوں کی سمجھائی ہوئی​

​

یہ جھچک اٹھنا جوانوں کی نظر سے بار بار​

یہ نگاہیں، شہر کی گلیوں میں گھبرائی ہوئی​

​

ہائے یہ کافر مناظر ہوش میں رکھتے نہیں​

جوش اِن فصلوں میں اکثر اپنی رسوائی ہوئی​

​

(جوش ملیح آبادی)​

۱۹۲۵ء​