ترجیع بند در نوحہ سرائیِ وفاتِ جناب مرزا اسد اللہ خان غالب - مرزا قربان علی بیگ خان سالک

[حسان خان]

ترجیع بند در نوحہ سرائیِ وفاتِ جناب استادی نجم الدولہ دبیر الملک میرزا اسد اللہ خان بہادر نظام جنگ غالب​

​

شب کو اختر شمار ہونا تھا​

روز آنکھوں میں تار ہونا تھا​

​

اب کہاں گل فشانئ مضمون​

خامہ حسرت نگار ہونا تھا​

​

شب شبِ انتظار بننی تھی​

روز روزِ شمار ہونا تھا​

​

حشر برپا ہوا تو خوب ہوا​

یہ بھی اے روزگار ہونا تھا​

​

کیوں بر آئے میری کوئی امید​

نا امیدی شعار ہونا تھا​

​

نفسِ چند کیوں رہے باقی​

دہر میں شرمسار ہونا تھا​

​

ہر ستم میرے واسطے اے چرخ​

خنجرِ آبدار ہونا تھا​

​

تیغِ بیداد تیز ہونی تھی​

اور مجھ پر ہی وار ہونا تھا​

​

نغمہ سنجِ نشاط کیا ہونا​

زیبِ لب بار بار ہونا تھا​

​

رشکِ عرفی و فخرِ طالب مُرد​

اسد اللہ خان غالب مُرد​

​

اب نہیں ہوش میں رہا کوئی​

کیا میرا حال پوچھتا کوئی​

​

کوئی آزارِ چرخ کا گلہ مند​

شاکئ بختِ نارسا کوئی​

​

چشمِ تر سے ہے کوئی طوفاں خیز​

ضبط سے ہے بھرا ہوا کوئی​

​

ہے کسی کی فغاں شرر افشاں​

سوزِ پنہاں سے جل گیا کوئی​

​

جو نہ مانگے کبھی کوئی مہجور​

لب پہ لاتا ہے وہ دعا کوئی​

​

اپنے عالم میں مبتلا ہے جہاں​

کوئی دشمن نہ آشنا کوئی​

​

نہیں چھٹنے کے زندگانی تک​

غم کی سمجھا نہ انتہا کوئی​

​

راز اتنا تو کھول دے مجھ پر​

نہیں اسرار داں ملا کوئی​

​

اب یہ کیوں آسماں کو ہے گردش​

فتنہ اس سے بھی ہے سوا کوئی​

​

رشکِ عرفی و فخرِ طالب مُرد​

اسد اللہ خان غالب مُرد​

​

جس میں رہتا تھا ہائے جلوۂ یار​

ہے وہی آنکھ غم سے طوفاں بار​

​

تھا سکوں میں جو مرکزِ خاکی​

نہیں اُس دل کو مثلِ برق قرار​

​

جان لب پر کبھی نہ آئی تھی​

اب لبوں سے بھی ہو گئی بیزار​

​

اب وہ پیمانۂ حیات ہوا​

زیبِ کف تھا جو ساغرِ سرشار​

​

یک نفس زندگی محال ہوئی​

کاش آساں ہو مردنِ دشوار​

​

رات بدتر ہے روزِ ماتم سے​

روزِ ظلمت میں غیرتِ شبِ تار​

​

مرگ کا اب خدا سے طالب ہوں​

پہلے کیا کیا تھی مانگنے میں عار​

​

زہر کھانے میں خوف تھا کیا کیا​

اب سمجھتا ہوں چارۂ آزار​

​

سببِ گریہ پوچھتے ہیں لوگ​

مجھ کو کہنا پڑا یہی ناچار​

​

رشکِ عرفی و فخرِ طالب مُرد​

اسد اللہ خان غالب مُرد​

​

نہ کروں گا علاجِ دردِ جگر​

زندگی موت سے نہیں بہتر​

​

دلِ گم گشتہ کا کہوں کیا حال​

کہ مجھے جان کی نہیں ہے خبر​

​

سطحۂ خاک کی الٰہی خیر​

آج رکتے نہیں ہیں دیدۂ تر​

​

شمعِ بزمِ سخن کی خاموشی​

دے گئی نالہ ہائے صور اثر​

​

یہ کس آتش زباں کا مرنا آہ​

کر گیا برق سے سوا مضطر​

​

کشتِ امید ہو گئی تاراج​

خرمنِ صبر پر چلی صرصر​

​

نخلِ حرماں میں تازگی آئی​

شجرِ آرزو ہوا بے بر​

​

مجھ پہ سو بار حشر بھی گزرا​

پر نہ اس حادثے سے تھا بڑھ کر​

​

ہو گیا ہے مرا یہ تکیہ کلام​

پہلے ہر بات سے یہ ہے لب پر​

​

رشکِ عرفی و فخرِ طالب مُرد​

اسد اللہ خان غالب مُرد​

​

خضرِ راہِ سخن جہاں سے گیا​

ہادئ راہ کارواں سے گیا​

​

مرگ کا زندگی میں تھا کھٹکا​

یہ بھی غم ہائے جاوداں سے گیا​

​

شعلے ہر بات میں نکلتے ہیں​

ضبط اب سوزشِ نہاں سے گیا​

​

شکر ہے موت جلد اگر آ جائے​

شکوہ اب مرگِ ناگہاں سے گیا​

​

دہر ہے پر نہیں ہے رونقِ دہر​

باعثِ زیبِ دہر یہاں سے گیا​

​

گل ہیں لیکن نہیں بہارِ نظر​

رنگ گویا کہ گلستاں سے گیا​

​

دل ہے لیکن نہیں ہے دل کو قرار​

صبر گویا کہ اپنی جاں سے گیا​

​

خاک میں مل گیا عروجِ سخن​

مہر معنی کے آسماں سے گیا​

​

یاد ہے وہ عذوبتِ گفتار​

اب سخن کا مزا زباں سے گیا​

​

رشکِ عرفی و فخرِ طالب مُرد​

اسد اللہ خان غالب مُرد​

​

غمِ استاد ہے اگر یہ ہے​

یا خدا کیونکہ زندگی ہوگی​

​

مبتلائے الم ہوں کیا جانوں​

عیش کیا شے ہے اور خوشی کیسی​

​

دم بدم اپنے حال پر رونا​

اور رونے پہ گاہ گاہ ہنسی​

​

میں ہوں اور رنجِ بیکسی افسوس​

وہ بھی دن تھے کہ خوش گزرتی تھی​

​

ایک دن دہر میں مری فریاد​

ہائے ہو جائے گی کہانی سی​

​

آسماں گر پڑے تو گرنے دو​

سر پر اک بوجھ اپنے یہ بھی سہی​

​

شق اگر ہو تو زمیں ہو جائے​

میں ہوں پیوند کاش جیتے جی​

​

کیجئے نالہ اور مر رہئے​

زندگی کی ہے کائنات یہی​

​

کیا کہوں کون مر گیا سالک​

آپ کہتے ہیں طالب و عرفی​

​

رشکِ عرفی و فخرِ طالب مُرد​

اسد اللہ خان غالب مُرد​

​

(مرزا قربان علی بیگ خان سالک)​

​

 

[محمد وارث]

واہ بہت خوب