جوش بے چارگی

[حسان خان]

خموشی کا سماں ہے اور میں ہوں​

دیارِ خفتگاں ہے اور میں ہوں​

​

کبھی خود کو بھی انساں کاش سمجھے​

یہ سعیِ رائگاں ہے اور میں ہوں​

​

کہوں کس سے کہ اس جمہوریت میں​

ہجومِ خسرواں ہے اور میں ہوں​

​

پڑا ہوں اک طرف دھونی رمائے​

عتابِ رہرواں ہے اور میں ہوں​

​

کہاں ہے ہمزباں اللہ جانے​

فقط میری زباں ہے اور میں ہوں​

​

خموشی ہے زمیں سے آسماں تک​

کسی کی داستاں ہے اور میں ہوں​

​

قیامت ہے خود اپنے آشیاں میں​

تلاشِ آشیاں ہے اور میں ہوں​

​

جہاں اک جرم ہے یادِ بہاراں​

وہ لافانی خزاں ہے اور میں ہوں​

​

ترستی ہیں خریداروں کو آنکھیں​

جواہر کی دکاں ہے اور میں ہوں​

​

نہیں آتی اب آوازِ جرس بھی​

غبارِ کارواں ہے اور میں ہوں​

​

مآلِ بندگی اے جوش توبہ​

خدائے مہرباں ہے اور میں ہوں​

​

(جوش ملیح آبادی)​

 

[طارق شاہ]

کہاں ہے ہمزباں اللہ جانے​

فقط میری زباں ہے اور میں ہوں​

​

خموشی ہے زمیں سے آسماں تک​

کسی کی داستاں ہے اور میں ہوں​

​

کیا کہنے صاحب!​

​

تشکّر شیئر کرنے پر !​

بہت شاد رہیں​