حسان خان
لائبریرین
اے شیخ و گبر سبحہ و زنار توڑیے
پر دل کسی بشر کا نہ زنہار توڑیے
پیرِ مغاں کو جی میں ہے کعبہ بنائیے
بت نشۂ شراب میں دو چار توڑیے
چہرے پہ خط ہوا ہے برنگِ سپر سیاہ
بس اب تو اپنے ناز کی تلوار توڑیے
برسوں دہانِ زخم سے ہنستے رہے ہیں ہم
اک عمر رونے کا بھی نہ اب تار توڑیے
آیا مہِ صیام علی الرغمِ محتسب
روزے شراب سے سرِ بازار توڑیے
ہم وحشیوں کے پاؤں کو کانٹوں سے کیا ہے انس
ہاتھوں سے بھی گلوں کے عوض خار توڑیے
ہے کس کو فہم زمزمہ ہائے صریر کا
بس عندلیبِ کلک کی منقار توڑیے
ہاروں کی ہم سے دل شکنی ہو سکے کہاں
یاں پاس ہے نہ خاطرِ اغیار توڑیے
خرمہرے سے بھی گوہرِ مضموں کی کم ہے قدر
وہ وقت ہے کہ کلکِ گہربار توڑیے
ہم جورِ چشمِ یار سے دم مارتے نہیں
یعنی روا ہے کب دلِ بیمار توڑیے
یاں دردِ سر خُمار سے ہے واں دکان بند
ٹکرا کے سر کو اب درِ خَمّار توڑیے
ٹکراؤں واں جو سر تو وہ کہتا ہے کیا مجھے
صاحب نہ مجھ غریب کی دیوار توڑیے
دم توڑنا ہے فرقتِ جاناں میں اپنا کام
کچھ کوہکن نہیں ہیں جو کہسار توڑیے
ناسخ بقول افصحِ ہندوستاں کبھی
زاہد کا دل نہ خانۂ خمار توڑیے
(امام بخش ناسخ)
