جوش اعترافِ عجز

[حسان خان]

لوگ کہتے ہیں کہ میں ہوں شاعرِ جادو بیاں​

صدرِ معنیٰ، داورِ الفاظ، امیرِ شاعراں​

​

اور خود میرا بھی کل تک، خیر سے، تھا یہ خیال​

شاعری کے فن میں ہوں منجملۂ اہلِ کمال​

​

لیکن اب آئی ہے جب اک گونہ مجھ میں پختگی​

ذہن کے آئینے پر کانپا ہے عکسِ آگہی​

​

آسماں جاگا ہے سر میں اور سینے میں زمیں​

اب مجھے محسوس ہوتا ہے کہ میں کچھ بھی نہیں​

​

جہل کی منزل میں تھا مجھ کو غرورِ آگہی​

اتنی لامحدود دنیا اور میری شاعری​

​

زلفِ ہستی اور اتنے بے نہایت پیچ و خم​

اڑ گیا رنگِ تعلی کھل گیا اپنا بھرم​

​

میرے شعروں میں فقط اک طائرانہ رنگ ہے​

کچھ سیاسی رنگ ہے، کچھ عاشقانہ رنگ ہے​

​

کچھ مناظر، کچھ مباحث، کچھ مسائل، کچھ خیال​

اک اچٹتا سا جمال، اک سر بہ زانو سا جلال​

​

میرے قصرِ شعر میں غوغائے فکرِ ناتمام​

ایک درد انگیز درماں، اک شکست آمادہ جام​

​

گاہ سوزِ چشم و ابرو، گاہ سوزِ ناؤنوش​

گاہ خلوت کی خموشی، گاہ جلوت کا خروش​

​

چہچہے کچھ موسموں کے، زمزمے کچھ جام کے​

دیرِ دل میں چند مکھڑے مرمریں اصنام کے​

​

چند زلفوں کی سیاہی، چند رخساروں کی آب​

گاہ حرفِ بے نوائی، گاہ شورِ انقلاب​

​

گاہ مرنے کے عزائم، گاہ جینے کی امنگ​

بس یہی سطحی سی باتیں، بس یہی اوچھے سے رنگ​

​

بے خبر تھا میں کہ دنیا راز اندر راز ہے​

وہ بھی گہری خامشی ہے جس کا نام آواز ہے​

​

یہ سہانا بوستاں سرو و گل و شمشاد کا​

ایک پل بھر کا کھلنڈراپن ہے ابر و باد کا​

​

ابتدا و انتہا کا علم نظروں سے نہاں​

ٹمٹماتا سا دیا، دو ظلمتوں کے درمیاں​

​

انجمن میں تخلیے ہیں، تخلیوں میں انجمن​

ہر شکن میں اک کھچاوٹ، ہر کھچاوٹ میں شکن​

​

ہر گماں میں اک یقیں سا، ہر یقیں میں سو گماں​

ناخنِ تدبیر بھی خود ایک گتھی بے اماں​

​

ایک ایک گوشے سے پیدا وسعتِ کون و مکاں​

ایک ایک خوشے میں پنہاں صد بہارِ جاوداں​

​

برق کی لہروں کی وسعت الحفیظ و الاماں​

اور میں صرف ایک کوندے کی لپک کا رازداں​

​

رازداں کیا، مدح خواں اور مدح خواں بھی کم سواد​

نابلد، نادان، ناواقف، ندیدہ، نامراد​

​

کیوں نہ پھر سمجھوں سبک اپنے سخن کے رنگ کو​

نطق نے الماس کے بدلے تراشا سنگ کو​

​

لیلیِٰ آفاق الٹتی ہی رہی پیہم نقاب​

اور یہی عورت، مناظر، عشق، صہبا، انقلاب​

​

پا رہا ہوں شاید اب اس تیرہ حلقے سے نجات​

کیونکہ اب پیشِ نظر ہے عقدہ ہائے کائنات​

​

یہ بھنچی، الجھی زمیں، یہ پیچ در پیچ آسماں​

الامان و الامان و الامان و الاماں​

​

اک نفس کا تار اور یہ شورِ عمرِ جاوداں​

اک کڑی اور اس میں زنجیروں کے اتنے کارواں​

​

ایک ایک لمحے میں اتنے کاروانِ انقلاب​

ایک ایک ذرے میں اتنے ماہتاب و آفتاب​

​

اک صدا اور اس میں یہ لاکھوں ہوائی دائرے​

جس کے شعبوں کو اگر چن لیں تو دنیا گونج اٹھے​

​

ایک بوند اور ہفت قلزم کے ہلا دینے کا جوش​

ایک گونگا خواب اور تعبیر کا اتنا خروش​

​

اک کلی اور اس میں صدیوں کی متاحِ رنگ و بو​

صرف اک لمحے کی رگ میں اور قرنوں کا لہو​

​

ہر قدم پر نصب ہیں اسرار کے اتنے خیام​

اور اس منزل میں میری شاعری، میرا کلام​

​

جس میں رازِ آسماں ہے اور نہ اسرارِ زمیں​

ایک خس، اک دانہ، اک جو، ایک ذرہ بھی نہیں​

​

نوعِ انسانی کو جب مل جائے گی رفتارِ نور​

شاعرِ اعظم کا تب ہو گا کہیں جا کر ظہور​

​

خاک سے پھوٹے گی جب عمرِ ابد کی روشنی​

جھاڑ دے گی موت کو دامن سے جس دن زندگی​

​

جب ہماری جوتیوں کی گرد ہوگی کہکشاں​

تب جنے گی نسلِ آدم شاعرِ جادو بیاں​

​

فکر میں کامل نہ فنِ شعر میں یکتا ہوں میں​

کچھ اگر ہوں تو نقیبِ شاعرِ فردا ہوں میں​

​

(جوش ملیح آبادی)​

 

[مدیحہ گیلانی]

واہ کیا بات ہے جوش کی قادر کلامی،مشاقی اور زبان دانی کی ۔۔بےحد عمدہ انتخاب حسان بچے ۔۔جیتے رہیئے۔

 

[نایاب]

بہت خوب انتخاب