بہادر شاہ ظفر اسے یاروں نے میرا رقعہ جا کر دے دیا ہوتا

[حسان خان]

اسے یاروں نے میرا رقعہ جا کر دے دیا ہوتا​

کھلا گر دے نہ سکتے تھے چھپا کر دے دیا ہوتا​

​

بگڑ جاتا ترا کیا سرخ رو میں سب میں ہو جاتا​

مجھے اک پان تو تُو نے بنا کر دے دیا ہوتا​

​

نہ ہوتے مجھ سے تم سینہ بسینہ ہو کے ہمبستر​

پر اک بوسہ تو منہ سے منہ بھڑا کر دے دیا ہوتا​

​

گوارا شربتِ دیدار دینا گر نہ تھا تجھ کو​

بلا سے زہر ہی مجھ کو پلا کر دے دیا ہوتا​

​

بھروسے میں جوابِ خط کے مارا ہائے کیوں مجھ کو​

جوابِ صاف ہی قاصد نے آ کر دے دیا ہوتا​

​

لگاتا خضر کیوں آبِ بقا کو منہ سے اے ساقی​

جو تو نے جامِ مے منہ سے لگا کر دے دیا ہوتا​

​

ظفر لے کر تمہارا دل وہ کاہے کو مکر جاتا​

اگر تم نے اسے سب کو جتا کر دے دیا ہوتا​

​

(سراج الدین بہادر شاہ ظفر)​