حسان خان
لائبریرین
آ اے ندیم، طاعتِ مینا و مے کریں
اک جام پر نثار دو صد روم و رے کریں
ہو جائیں سطحِ وقت سے، آ ہمنشیں بلند
مابینِ صبح و شام سفر تا بکے کریں
بجنے لگے درود سے محرابِ کائنات
انفاسِ روزگار سے پیدا وہ لے کریں
جس کا ہے ایک نقطہ ازل، دوسرا ابد
اک ہُو سے نیم آن میں وہ راہ طے کریں
آ شورشِ معاش و خروشِ معاد کو
غرقِ نوائے چنگ و دف و عود و نے کریں
آ خاکِ بارگاہِ قناعت پہ بیٹھ کر
تشریحِ بے نوائیِ کاؤس و کے کریں
قرآن کو گواہ بنا کر، بصد خروش
اعلانِ سودمندیِ جرعاتِ مے کریں
اٹھ جوش، موسموں کو سمونے کے واسطے
تسخیرِ مُلکِ بہمن و اقلیمِ دے کریں
(جوش ملیح آبادی)