جوش آدمی نامہ - حضرت جوش ملیح آبادی

[حسان خان]

گو رفعتوں میں چرخ سے بالا ہے آدمی​

ہر شے سے کائنات کی اعلیٰ ہے آدمی​

محرابِ زندگی کا اجالا ہے آدمی​

لیکن ابھی تو طفلِ دوسالا ہے آدمی​

اب تک تو خاک چھاننے والا ہے آدمی​

​

اِس آدمی کا تجھ سے کہوں کیا میں کیف و کم​

اک آن میں ہے سبز، تو اک آن میں بھسم​

تریاق ہے جو صبح کو، تو شام کو ہے سم​

منعم ہے، تو ہے شیر کا بھی خویشِ محترم​

مفلس ہے تو گدھے کا بھی سالا ہے آدمی​

​

قوت میں بے نظیر ہے، صولت میں فرد ہے​

عزت میں بے مثال ہے، طاقت میں فرد ہے​

اعزاز و احترام و جلالت میں فرد ہے​

پیسہ ہے جیب میں تو شرافت میں فرد ہے​

پیسہ اگر نہیں تو رِذالا ہے آدمی​

​

کس کو خبر کہ دیوِ تہمتن بنے گا کب​

شاہینِ زندگی کا نشیمن بنے گا کب​

طاقت کا اس زمین پہ مامن بنے گا کب​

کیا جانیے کہ فاتحِ آہن بنے گا کب​

اب تک تو صرف روئی کا گالا ہے آدمی​

تہمتن (tahamtan) = مردِ قوی جثہ و شجاع؛ رستم کا لقب​

​

اب تک تو آستانِ حماقت ہے اور سر​

اب تک تو 'خیر' سُست ہے، اور تیز گام 'شر'​

اب تک تو پھر رہا ہے دل و ذہن اِدھر اُدھر​

ہر ریوِ کامیاب کی خوراک ہے بشر​

ہر دیوِ کامراں کا نوالا ہے آدمی​

ریو (rev) = فریب، مکر، تزویر، دغا، ریا، حیلہ​

​

انسان وہ کلی ہے جو اب تک کھلی نہیں​

وہ شاخ ہے صبا سے جو اب تک ہلی نہیں​

پوشاک ہے یہ وہ جو ابھی تک سلی نہیں​

کنجی ہنوز عقل کی اُس کو ملی نہیں​

جو آج تک ہے بند، وہ تالا ہے آدمی​

​

اب تک ہے بزمِ جہل میں ناداں ڈٹا ہوا​

اب تک ہے علم و عقل و ہنر میں گھٹا ہوا​

اب تک لباسِ ذہن و ذکا ہے پھٹا ہوا​

اب تک ہے خاکِ تیرہ میں انساں اٹا ہوا​

ہرچند خاکِ تیرہ سے بالا ہے آدمی​

​

پروا کسے جو آج ہے دن بھی سیاہ رات​

کیا غم اگر زمین پہ وا ہے درِ ممات​

یعنی بحکمِ دہر و بفرمانِ کائنات​

انساں کو آج روند رہے ہیں جو حادثات​

کل اُن کو جوش روندنے والا ہے آدمی​

​

(جوش ملیح آبادی)​

 

[نایاب]

بہت خوب انتخاب

 

[محمد وارث]

لاجواب

 

[سید زبیر]

منعم ہے، تو ہے شیر کا بھی خویشِ محترم
مفلس ہے تو گدھے کا بھی سالا ہے آدمی
بہت عمدہ انتخاب