لقمان پنجابی
محفلین
اسلام آباد ۔۔ کپاہ دے امریکی ماہرین دے اک اعلیٰ سطح دے وفد نے پیچھلے ہفتے پاکستان دا دورہ کیتا تے اپنڑے ہم منصب پاکستانی سائنسداناں نال رل کے پاکستان وچ کپاہ دی پیداوار نوں نقصان کرنڑ آلی تباہ کن بیماری توں فصل نوں محفوظ رکھنڑ لئی کیتیاں جانڑ آلیاں کوششاں دا جائزہ لیا تے ایس وارے نویں حکمت عملی بنڑائی۔ کاٹن لیف کرل وائرس (پتہ مروڑ جرثومہ) آلی بیماری نال کوئی لگ بگ کپاہ دیاں 15 لکھہ گنڈاں کپاہ دی فصل دا 15 فیصد ایس بیماری دی نظر ہوجاندا وے۔ امریکی سائنسداناں دی ٹیم نے لاہور تے فیصل آباد دیاں تجربہ گاہواں دا دورہ کیتا تے امریکی محکمہ زراعت (یو ایس ڈی اے) ولوں دیتے جانڑ آلے گرین ہاؤسز وچ ویجاں دی آزمائشی کاشت دا معائنہ کیتا۔ اے دورہ کاٹن لیف کرل وائرس دے خلاف مدافعت آلے بی دی تیاری لئی پاکستانی سائنسداناں دے نال مسلسل اشتراک دا حصہ وے۔ امریکہ پاکستان دے زرعی شعبے خاص طور تے چھوٹے کاشتکاراں دی کھیتی وچ وادھے لئی پاکستانی سائنسداناں نال رل کے کم کرریہا وے تے کپاہ دے شعبے وچ رل کے کم کرنڑ آلے امریکی تے پاکستانی سائنسداناں دے درمیان تعاون ایس عزم دی اک اوچی مثال وے۔
امریکی محکمہ زراعت دے کپاہ دی پیداواری صلاحیت وچ وادھے دے پروگرام دے صف اول دے سائنسدان ڈاکٹر برائین شیفلر نے زرعی تحقیق دے قومی ادارے (این اے آر سی)، یونیورسٹی آف پنجاب انسٹی ٹیوٹ آف ایگریکلچرل سائنسز، ملتان تے سکرنڈ وچ سینٹرل کاٹن انسٹی ٹیوٹ تے دوجے مقامات تے پاکستانی زرعی ماہرین ولوں کیتاں جانڑ آلیاں پیش رفتاں دی تعریف کردیاں ہویاں آکھیا کہ پاکستانی سائنسداناں نے سی ایل سی وی دی بیماری دے خلاف مدافعت تے چو کھی پیداوار دی صلاحیت دے حامل کپاہ دا بی تیار کرنڑ لئی بڑے صبر نال کپاہ دے ویجاں دے ہزاراں نمونیاں دا مشاہدہ کیتا۔ ڈاکٹر برائین شیفلر نے آ کھیا کے ایس تباہی کھلارنڑ آلی بیماری دے خلاف پاکستانی محققاں دے کم وچ اگے ودھنڑ دی رفتار ڈھاڈی متاثر کن وے۔ امریکی محکمہ زراعت ایس بیماری دے پاکستانی کپاہ دی فصل تے اثر گھٹ کرنڑ تے پاکستانی کساناں دی فصل دی پیداوار ودھاونڑ دی کوششاں لئی تعاون کرنڑ تے خوشی محسوس کردا وے۔
امریکی محکمہ زراعت روزگار نوں چنگیاں کرنڑ لئی تے پاکستان دی ودھدی ہوئی خوراک دی ضرورتاں نوں پورا کرنڑ تے زرعی پیداوار وچ وادھا کرنڑ تے پاکستانی سائنسداناں تے کاشتکاراں دی مدد کرریہا وے۔ اے قدم معاشی ترقی لئی مدد دے جامع امریکی پروگرام دا صرف اک حصہ وے جیدے وچ گومل زام تے ست پارہ ڈیماں دے نال 2 لکھہ ایکڑتوں ودھ رقبے نو سیراب کرنا، آبادیاں نو جوڑنا تے تجارت نو ودھاوا دینڑ لئی اک ہزار کلو میٹرتوں لمی سڑکاں دی تعمیر، پنجاب وچ ڈیری فارماں نو جدید خطوط تے قائم کرنا تے چھوٹے تے درمیانے درجے دےے کاروباری اداریاں دی ترقی لئی سرمایہ کاری دے نجی ایکویٹی فنڈز دینڑاں شامل وے۔
لقمان – ڈيجيٹل آؤٹ ريچ ٹيم – يو ايس اسٹيٹ ڈيپارٹمينٹ
http://www.facebook.com/USDOTPunjabi