آپ کے پسندیدہ اشعار!

[طارق شاہ]

کون کرتا ہے پس و پیش، مدِ کارِ خراب
دل ہی مائل نہ اگر ہو کہ کریں کارِ صواب

شفیق خلش

 

[طارق شاہ]

مال و زر ایک طرف، جان بھی لے لیتے ہیں !
ڈر یہ جن میں نہ ہو، دینا ہے خُدا کو تو جواب

شفیق خلش

 

[طارق شاہ]

چھینا جھپٹی کے مناظر کا مزہ لینے کو
پالتو کتوں کے احساس پہ ہنس دینے کو

بھوکے مجبور غلاموں کا گروہ
ٹکٹکی باندھ کے تکتا ہوا استادہ ہے

ساحر لدھیانوی

 

[طارق شاہ]

صحرا کو جو چمن بنادیں
ایسے دیوانے کم ہوں گے

آنکھ اُٹھا کر حّدِ نظر تک
دیکھو گےتوہمیں ہم ہوں گے

فراق گورکھپوری

 

[طارق شاہ]

پتہ پتہ ، بُوٹا بُوٹا حال ہمارا جانے ہے
جانے نہ جانے گُل ہی نہ جانے، باغ تو سارا جانے ہے

میر تقی میر

 

[صائمہ شاہ]

دل میں اِک شور سا اُٹھا تھا کبھی
پھر یہ ہنگامہ عُمر بھر ہی رہا

حفیظ ہوشیار پوری

 

[صائمہ شاہ]

روشنی کا نام لیکر لڑ رہے ہیں آپس میں
اِس طرف بھی کُچھ سائے ، اُس طرف بھی کچھ سائے

آنند نرائن مُلا

 

[ام اریبہ]

"پچیسواں گھنٹہ"

دن رات کا یہ
سفاک سفر

جتنا بھی مجھے
الجھائے رکھے

جس طور مجھے
تقسیم کرے

جس سمت سے
مجھ پر وار کرے

جتنا بھی مجھے
مِسمار کرے

پر تجھ کو سوچنے
کی خاطر

"پچیسواں گھنٹہ میرا ھے
ماہی احمد

https://www.facebook.com/photo.php?...41825.100005333591686&type=1&relevant_count=1

 

[طارق شاہ]

ہو نہ احساسِ اسِیری تو رہائی ہے محال
ایسے قیدی نام تک لیتے نہیں معیاد کا

حفیظ جالندھری

 

[طارق شاہ]

ضعف کی یہ ہمّتیں ہیں، ناتوانی کا یہ زور
ٹکڑے ٹکڑے کردیا دامن مِری فریاد کا

حفیظ جالندھری

 

[طارق شاہ]

سچ ہے کہ، پاسِ خاطرِ نازک عذاب ہے
تھا دل کو جب فراغ کہ وہ مہرباں نہ تھا

الطاف حُسین حالی

 

[طارق شاہ]

شرما کے یُوں نہ دیکھ ادا کے مقام سے
اب بات بڑھ چُکی ہے حیا کے مقام سے

دل کے مُعاملے میں نتیجے کی فکر کیا
آگے ہےعِشق، جُرم وسزا کے مقام سے

ساحر لدھیانوی

 

[طارق شاہ]

اُڑ گیا ہے منزلِ دُشوار میں غم کا سمند
گیسوئے پُر پیچ و خم کے تازیانے کی کہو

شام ہی سے گوش بر آواز ہے بزمِ سُخن
کچھ فراق اپنی کہو، کچھ زمانے کی کہو

فراق گورکھپوری

 

[زھرا]

کہیں بھی دل کو لگاوٴں ... اُسی کے سائے میں ہوں
گماں سے جو نہ گیا وہ یقیں سے کیا جاتا

نصیر ترابى

 

[طارق شاہ]

فطرت کے حسیں نظاروں میں پُر کیف نظارے اور بھی ہیں
میخانہ اگرویراں ہے توکیا، رِندوں کے ٹِھکانے اور بھی ہیں

آغازِ جفا کی تلخی سے، گھبرا نہ دلِ آزار طلب !
یہ وقت یہیں پر ختم نہیں، کچھ تلخ زمانے اور بھی ہیں

شکیل بدایونی

 

[طارق شاہ]

جو کوئی آوے ہے نزدیک ہی بیٹھے ہے تِرے
ہم کہاں تک، تِرے پہلو سے سرکتے جاویں
میرحسن

 

[طارق شاہ]

اِس راہِ ارم سے بھی ، ہے دوزخ ہی مقدّر !
سمجھے نہ یہ، اِس دور کے شدّاد ابھی تک

عنبرامروہوی

 

[طارق شاہ]

تیری محفل کا پاس تھا دل کو
سہہ گیا سب کے نا روا الفاظ

تھا جو اُن میں، وہی مزہ پایا
جن لبوں سے ہُوئے ادا الفاظ

عنبرامروہوی

 

[طارق شاہ]

بُتوں کے عِشق میں کیونکر پھنسا اب یہ خدا جانے
بظاہر تو ہمارا دل، بڑا پکّا مُسلماں تھا

حفیظ جالندھری

 

[طارق شاہ]

بہت شورِیدہ سر تھا میں، بہت محشر بداماں تھا
مِرا دست و گریباں بھی کبھی دست و گریباں تھا

وہ اک پردہ، خرد کے لب پہ جس کا نام داماں تھا
جنُوں کے ہاتھ میں تھا، اور گریباں ہی گریباں تھا

مجھے برہم سمجھ کے، ہجوِ مے کو پی گیا واعظ
وگرنہ آج میرا ہاتھ تھا ، اُس کا گریباں تھا

حفیظ احباب کے اِرشاد کی تعمیل کردی ہے
کہ حکمِ قافیہ پیمائیِ لفظِ گریباں تھا

حفیظ جالندھری