دُوروں دُوروں نہ لے چسکے

دُوروں دُوروں نہ لے چسکے
آ جا کر لئیے پیار او دھسکے

اج کوئی نویں فٹیک اے پؤنی
تائیوں ایدے لاندا ایں مسکے

ساڈے لاگے بتھیری تھاں
غیراں وچ کیوں بیٹھاں پھس کے

میرے ول توں فیر ای آویں
پہلے اوہدروں ہویا نس کے

شاماں نوں اج دیر ہو جانی
گھر دیاں نوں توں آویں دس کے

سرمہ وی بڑا کھچ کے پایا
سَک وی اج تے ملیا کس کے

دل تیرے وچ جو مرضی اے
گوکے دے نال بولیں ہس کے

مشتاق احمد گوگا​