میر یہ سَرا سونے کی جاگہ نہیں ، بیدار رہو۔ میر تقی میر

[فرخ منظور]

غزل

یہ سَرا سونے کی جاگہ نہیں ، بیدار رہو
ہم نے کر دی ہے خبر تم کو ، خبردار رہو

آپ تو ایسے بنے اب کہ جلے جی سب کا
ہم کو کہتے ہیں کہ تم جی کے تئیں مار رہو

لاگ اگر دل کو نہیں ، لطف نہیں جینے کا
الجھے سلجھے کسو کاکُل کے گرفتار رہو

گرچہ وہ گوہرِ تر ہاتھ نہیں لگتا لیک
دم میں دم جب تئیں ہے ، اُس کے طلب گار رہو

سارے بازارِ جہاں کا ہے یہی مول اے میر
جان کو بیچ کے بھی دل کے خریدار رہو

(میر تقی میر)

 

[شاہ حسین]

بہت خوب جناب ۔ بہتریں انتخاب ہے ۔

 

[فرخ منظور]

بہت خوب جناب ۔ بہتریں انتخاب ہے ۔

شکریہ شاہ جی!

 

[محمد وارث]

بہت شکریہ فرخ صاحب شیئر کرنے کیلیے!

 

[فرخ منظور]

بہت شکریہ فرخ صاحب شیئر کرنے کیلیے!

بہت شکریہ وارث صاحب!

 

[الف عین]

واہ۔۔ میرے خیال میں کلاسیکی شاعری کا ایک انتخاب بھی شائع کیا جا سکتا ہے برقی طور پر۔

 

[جیہ]

بہت خوب انتخاب ہے۔ واقعی ایک ای بک بنایا جا سکتا ہے۔

مجھے لگ رہا ہے کہ میر کو میں کچھ کچھ پسند کرنے لگی ہوں۔ شکریہ فرخ میر کو متعارف کرانے کے لیے

 

[فرخ منظور]

بہت خوب انتخاب ہے۔ واقعی ایک ای بک بنایا جا سکتا ہے۔

مکجے لگ رہا ہے کہ میر کو میں کچھ کچھ پسند کرنے لگی ہوں۔ شکریہ فرخ میر کو متعارف کرانے کے لیے

شکریہ جویریہ! دراصل میر نے اپنا انتخاب نہیں کیا جیسے غالب نے اپنے دیوان کا کیا۔ اگر میر بھی اپنا انتخاب کر لیتے تو شاید غالب جتنے ہی مقبول ہوتے لیکن میر کا یہ کام اب میں تو کر ہی رہا ہوں۔

 

[الف عین]

کسی کو تو کرنا ہی تھا یہ کام، ہم ہوئے تم ہوئے کہ میر ہوئے۔

 

[جیہ]

آپ کا نام سنہری حروف میں لکھا جائے گا۔ 6 دیوانوں کو کنگال کر ایسے موتی چن لانا واقعی دل گردے کا کام ہے

 

[فرخ منظور]

کسی کو تو کرنا ہی تھا یہ کام، ہم ہوئے تم ہوئے کہ میر ہوئے۔

شکریہ اعجاز صاحب! آپ اپنے حصے کا ثواب تو سمیٹ ہی چکے ہیں۔ اب ہم بھی کچھ رمضان میں ثواب کما لیں۔

 

[جیہ]

لو جی یہ تو الٹی گنگا بہانے والی بات ہوئی

 

[فرخ منظور]

لو جی یہ تو الٹی گنگا بہانے والی بات ہوئی

الٹی گنگا نہیں بلکہ ہتھیلی پر سرسوں جما رہا ہوں۔

 

[فرخ منظور]

میر کا ایک شعر یاد آگیا آپ کی نذر۔ ویسے آپ اس دھاگے کو بھی دیکھیے گا۔

مستانہ اگرچہ میں طاعت کو لگا جاتا
پر بعدِ نماز اُٹھ کر مے خانے چلا جاتا

(میر)