ابن انشا ہم رات بہت روئے، بہت آہ و فغاں کی ۔ ابنِ انشا

ابنِ انشاؔ کی ایک لا جواب غزل آپ احباب کی بصارتوں کی نذر

ہم رات بہت روئے، بہت آہ و فغاں کی
دل درد سے بوجھل ہو تو پھر نیند کہاں کی

سر زانو پہ رکھے ہوئے کیا سوچ رہی ہو؟
کچھ بات سمجھتی ہو محبت زدگاں کی؟

تم میری طرف دیکھ کے چپ ہو سی گئی تھیں
وہ ساعتِ خوش وقت نشاطِ گزراں کی

اک دن یہ سمجھتے تھے کہ پایانِ تمنا
اک رات ہے مہتاب کے ایامِ جواں کی

اب اور ہی اوقات ہے اے جانِ تمنا!
ہم نالہ کناں، بے گنَہاں، غم زدگاں کی

اس گھر کی کھلی چھت پہ چمکتے ہوئے تارو!
کہتے ہو کبھی جا کے وہاں بات یہاں کی ؟

برگشتہ ہوا ہم سے، یہ مہتاب تو پیارو!
بس بات سنی، راہ چلا، کاہکشاں کی

اللہ کرے میرؔ کا جنت میں مکاں ہو
مرحوم نے ہر بات ہماری ہی بیاں کی

ہوتا ہے یہی عشق میں انجام سبھی کا
باتیں یہی دیکھی ہیں محبت زدگاں کی

پڑھتے ہیں شب و روز اسی شخص کی غزلیں
غزلیں یہ حکایات ہیں ہم دل زدگاں کی

تم چرخِ چہارم کے ستارے ہوئے لوگو!
تاراج کرو زندگیاں اہلِ جہاں کی

اچھا ہمیں بنتے ہوئے، مٹتے ہوئے دیکھو
ہم موجِ گریزاں ہی سہی، آبِ رواں کی

انشاؔ سے ملو، اس سے نہ روکیں گے وہ، لیکن
اُس سے یہ ملاقات نکالی ہے کہاں کی

مشہور ہے ہر بزم میں اس شخص کا سودا
باتیں ہیں بہت شہر میں بدنام، میاں کی

اے دوستو! اے دوستو! اے درد نصیبو!
گلیوں میں، چلو سیر کریں، شہرِ بتاں کی

ہم جائیں کسی سَمت، کسی چوک میں ٹھہریں
کہیو نہ کوئی بات کسی سود و زیاں کی

انشاؔ کی غزل سن لو، پہ رنجور نہ ہونا
دیوانا ہے، دیوانے نے اک بات بیاں کی
(ابنِ انشا)
​

محمد علی شہکی کی آواز میں یہ غزل:


ایک نوجوان گلوکار عمار علی خان (جسے پہلے پہل تو ہم اپنے عمار ابنِ ضیا سمجھ کر خوش ہو رہے تھے لیکن بعد ازاں یو ٹیوب پر اس نوجوان کے مزید بے شمار گانے دیکھ کر معلوم ہوا کہ وہ ہماری خام خیالی تھی) کی آواز میں یہ غزل

 

مز ا آگیا جناب فاتح صاحب۔۔۔ بہت بہت شکریہ شریک محفل کرنے کے لیے۔۔

 

کاشفی صاحب! پذیرائی کے لیے آپ کا بھی شکریہ!

 

واہ واہ! ابنِ انشا کی کیا خوبصورت غزل انتخاب کی ہے۔ بہت شکریہ فاتح صاحب!

 

قبلہ! محبتیں ہیں آپ کی۔

 

ابنِ انشاء کی خوبصورت ترین غزلوں میں سے ہے۔

بہت شکریہ فاتح صاحب شیئر کرنے کیلیے۔

 

از محمد علی شہکی

 

از عطاء اللہ خان عیسیٰ خیلوی

 

شکریہ جناب

 

بہت ہی خوب انتخاب ہے بھائی ۔

خوش رہیے۔

 

شکریہ محمداحمد بھائی

 

ہم رات بہت روئے، بہت آہ و فغاں کی
دل درد سے بوجھل ہو تو پھر نیند کہاں کی

بہت ہی خوب واہ۔ ۔ ۔ ۔ ۔

 

شکریہ برگ حنا صاحبہ

 

اچھا ہمیں بنتے ہوئے، مٹتے ہوئے دیکھو
ہم موجِ گریزاں ہی سہی، آبِ رواں کی

جتنی پیاری غزل ہے۔۔ شہکی نے اتنے ہی دلکش انداز سے گا کر اس کا حق ادا کر دیا۔
فاتح بھائی بےحد شکریہ اس خوبصورت شیئرنگ کے لیے۔۔۔

دل درد سے بوجھل ہو تو پھر نیند کہاں کی​

 

واہ
ابنِ انشا کی کیا بات ہے!

 

دل کے ہاتھوں مجبور ہو کر اس عمدہ غزل کی مکرر تعریف کر رہے ہیں۔

 

انتخاب سراہنے کا شکریہ اور شہکی کے متعلق آ کے بیان سے سو فیصد اتفاق کا اعلان

 

شکریہ

 

اور ہماری جانب سے مکرر شکریہ

 

تم چرخِ چہارم کے ستارے ہوئے لوگو!
تاراج کرو زندگیاں اہلِ جہاں کی

واہ فاتح بھائی۔۔۔ زبردست اور لاجواب انتخاب۔۔۔۔ لطف آگیا۔۔۔۔